जाडो बढेपछि उपल्लो करानका विद्यालय एक महिनाका लागि बन्द
मुगु । जिल्लाका एक नगरसहित चार ओटा स्थानीय निकायमध्ये हिउँदको समयमा अत्यधिक चिसो हुने पूर्वी करान भेगमा पर्ने मुगुम कार्मारोङ गाउँपालिकाले उपल्लो करानका विद्यालयहरूमा एक महिना जाडो बिदा दिने निर्णय गरेको छ ।
अत्यधिक जाडो बढेपछि कर्मचारीलाई काम गर्न गाह्रो र शिक्षक–विद्यार्थीलाई पाठनमा अप्ठ्यारो हुनुभएपछि पुसको दोस्रो सातादेखि आगामी माघ १५ गते सम्मका लागि गाउँपालिका भित्र कम उच्च हिमाली बस्तीहरू सेरोग, दोल्फु,ताखा, खारी, कार्तिक, किम्री, चितै, मुगु, पुअ र दाउरा गरी करिब एक दर्जन गाउँका विद्यालयहरूमा एक महिना जाडो बिदा दिने निर्णय भएको मुगुम् कार्मारोङ गाउँपालिकाका अध्यक्ष छिरिङ क्याप्ने लामाले जानकारी दिनुभयो । ती बस्तीहरूमा जाडो अत्यधिक भएका कारण दिन प्रति दिन विद्यार्थी स्कुल आउन छाडेपछि एक महिना विद्यालय बन्द गर्नु परेको गाउँपालिकाले जनाएको छ ।
जाडोमा विद्यालय सञ्चालन गर्दा विद्यार्थी बिरामी हुने भएकाले एक महिनाका लागि माथिल्लो करानमा पठन पाठन बन्द गरिएको अध्यक्ष क्याप्ने लामाले बताउनुभयो ।
पालिकाले एक महिना जाडो बिदा दिने निर्णय गरेपछि गाउँपालिका भित्र कार्यरत शिक्षकहरू आफ्ना घरतर्फ लागेका छन् । गाउँपालिकामा एक महिनासम्म विकास निर्माणका कामदेखि अन्य सरकारी सेवा प्रवाहका कामहरूसमेत चिसोका कारण प्रभावित हुने बताइएको छ ।
बिस्तारै चिसो कम भएपछि माघ महिनाको १५ गते पछि गाउँ पालिका भित्रका सम्पुर्ण सरकारी सेवाका काम नियमित रूपबाट सञ्चालन हुने गाउँपालिकाले जनाएको छ । मुगुम कार्मारोङ गाउँपालिकाको माथिल्लो बस्ती मुगु, चितै, डोल्फू, किम्रीलगायत बस्तीका बासिन्दा जाडो छल्न बेँसी झरेपछि गाउँ सुनसान भएका छन् । जाडो छल्न बेँसी झरेका सर्वसाधारण गर्मी मौसम सुरु भएपछि गाउँ फर्किने गरेका छन् ।
प्रतिक्रिया राख्नुहोस्