घरघरबाट फोहोर किन्दै घोराही उपमहानगर

देउखुरी। घोराही उपमहानगरपालिकाले घर घरबाट फोहोर खरिद गर्न थालेको छ । बोटल र गुटखाका खोलमा पैसा आउन थालेपछि स्थानीय दङ्ग परेका छन् । गल्ने फोहोरबाट ग्यास र मल उत्पादनको तयारी अन्तिम चरणमा पु¥याइएको छ भने नगल्ने फोहोरलाई खरिद गरेर पुनः प्रयोगमा ल्याउन थालिएको छ ।

केही महिना पहिले सरसफाइ स्वयंसेवक परिचालन गरेर फोहोर किन्ने बारेमा जानकारी गराएको उपमहानगरपालिकाले गत शुक्रवारदेखि नागरिकहरूको घरमै पुगेर फोहोर खरिद गर्न थालेको हो । घोराही –१४ नयाँ बसपार्कमा जलजला होटेलकी सञ्चालक सीता रोकालाई फोहर व्यवस्थापनले निकै पीडा दिँदै आएको थियो । हरेक दिन बिहान फोहर जम्मा गरेर उपमहानगरको गाडीमा पठाउनपर्ने झन्झट हुने गर्थ्यो । पहिलो पटक फोहर बेचेकी रोकाले बिस केजी फोहरको रु दुई सय पाँच रुपैयाँ प्राप्त गर्नुभयो । होटेलबाट उत्पादन भएको फोहरले आम्दानी हुने भएपछि उहाँ खुसी हुनुहुन्छ ।

यो वर्षदेखि उपमहानगरभित्रको फोहर खरिद गर्ने नीति लिएपछि फोहर बिक्री गर्ने प्रतिस्पर्धा नै चलेको छ । चालु आर्थिक वर्षको बजेटमै राखेर उपमहानगरपालिकाले गत वैशाखदेखि फोहर खरिद गर्न सुरु गरेको थियो । अहिलेसम्म झन्डै रु बिस हजारको फोहर खरिद गरिएको उपमहानगरपालिका वातावरण तथा सरसफाइ महाशाखा प्रमुख लक्ष्मण अधिकारीले जानकारी दिनुभयो । उपमहानगरपालिकालाई प्लास्टिकमुक्त बनाउने अभियानअन्तर्गत यो कार्यक्रम अघि सारिएको हो ।

उपमहानगरपालिकाले प्लास्टिकको बोतलसहित नरम पोलिथिन एक किलोलाई रु दश, कपडा प्रति किलो रु पाँच, सुर्र्तीजन्य प्लास्टिकको फोहोर प्रति किलो रु दुई, गत्ता, कापीसहित वर्गीकरण अनुसारका फोहोरलाई रु दश देखि बीससम्ममा किलोमा खरिद गर्ने दर कायम गरिएको छ ।यसरी खरिद गरिएको गल्ने फोहोरलाई बायो ग्यासमा प्रयोग गरिने र नगल्ने फोहोरलाई उद्योगहरूसँग समन्वय गरेर विक्री गरिने नगर प्रमुख चौधरीले जानकारी दिनुभयो ।रासस