रेडियो नेपालबाट सेवा निवृत्त दुई कर्मचारीकाे बिदाई
![](https://onlineradionepal.gov.np/wp-content/uploads/2024/07/85A8989-1024x682.jpg)
काठमाडौँ । रेडियो नेपालबाट सेवा निवृत्त हुनुभएका दुई जना कर्मचारीलाई आज बिदाई गरिएको छ ।
सेवा निवृत्त कर्मचारीहरू मुख्य समाचार सम्पादक हरिशरण लामिछाने र प्रशासकीय अधिकृतबाट अवकाश प्राप्त हुनुभएका दावा तामाङलाई रेडियो नेपालमा एक कार्यक्रमको आयोजना गरी बिदाई गरिएको हो ।
![](https://onlineradionepal.gov.np/wp-content/uploads/2024/07/85A9000-1024x617.jpg)
बिदाई कार्यक्रममा रेडियो नेपालका कार्यकारी निर्देशक बुद्धिबहादुर केसीले अवकाश प्राप्त कर्मचारीका अनुभवहरूबाट नयाँ पुस्ताले सिक्नुपर्ने र सकारात्मक धारणा तथा प्रवृत्तिका साथ काम गरेमात्रै आफ्नो र संस्थाको विकासमा सहयोग पुग्ने बताउनुभयो ।
![](https://onlineradionepal.gov.np/wp-content/uploads/2024/07/85A9007-1024x648.jpg)
कार्यकारी निर्देशक केसीले रेडियो नेपालमा रहँदा उहाँहरूले पुर्याउनुभएको योगदान महत्त्वपूर्ण रहेको र आगामी दिनमा संस्थाको विकासका लागि सेवा निवृत्त कर्मचारीहरूको सल्लाह र सुझाव आवश्यक रहने बताउनुभयो ।
रेडियो नेपालका नायव कार्यकारी निर्देशकहरू खगेन्द्र खत्री र कृष्णचन्द्र पौडेलले संस्थालाई अगाडी बढाउन उहाँहरूको भूमिका उल्लेख्य रहेको भन्दै संस्थाको कामलाई थप व्यवस्थित गराउन पुर्याउनुभएको योगदानको चर्चा गर्नुभयो ।
![](https://onlineradionepal.gov.np/wp-content/uploads/2024/07/85A9011-1024x515.jpg)
समाचार महाशाखा निर्देशक पवन प्याकुरेल र कार्यक्रम महाशाखाका उपनिर्देशक ताराप्रसाद वस्तीले अवकाश प्राप्त हुनुभएका लामिछाने र तामाङले कार्यालयमा रहँदा देखाउनुभएको लगनशीलता र जिम्मेवारी वहनको प्रशंसा गर्नुभयो ।
अवकाश प्राप्त हुनुभएका मुख्य समाचार सम्पादक हरिशरण लामिछानेले सत्य तथ्य समाचारका लागि आज पनि आम नागरिकले रेडियो नेपाल नै सुन्ने गरेको भन्दै यसको साखलाई बचाई राख्नुपर्ने तथा समय र रेडियो नेपाल सँगसँगै अगाडी बढ्नुपर्ने बताउनुभयो ।
![](https://onlineradionepal.gov.np/wp-content/uploads/2024/07/85A9048-1-1024x502.jpg)
प्रशासकीय अधिकृतबाट सेवा निवृत्त हुनुभएका दावा तामाङले आँफुलाई रेडियो नेपालले नै आजको स्थानसम्म ल्याएको भन्दै काम र संस्थालाई माया गर्नुपर्ने धारणा राख्नुभयो ।
प्रतिक्रिया राख्नुहोस्