‘सबै दलको सहमतिमा संविधान संशोधन अघि बढाइने’
धनगढी । नेपाली काँग्रेसका उपसभापति पूर्णबहादुर खड्काले सबै दलको सहमतिमा संविधान संशोधन अघि बढाइने बताउनुभएको छ ।
धनगढीमा आज काँग्रेसको प्रदेश स्तरीय प्रशिक्षण कार्यक्रममा उपसभापति खड्काले काँग्रेस जिम्मेवार दल भएकाले संविधान कार्यान्वयनको जिम्मेवारी पनि काँग्रेसको काँधमा रहेको बताउनुभयो । उहाँले काँग्रेसकै नेतृत्वमा दलहरू मिलेर संविधान जारी भएको चर्चा गर्नुहुँदै संविधान संशोधनको विषयलाई काँग्रेसले अघि सारेको बताउनुभयो ।
उपसभापति खड्काले पार्टीको महासमिति बैठकमा प्रस्तुत प्रस्ताव केन्द्रीय समितिबाट पारित भएको र त्यसलाई दस्ताबेज बनाएर देशभर पुर्याउने तयारी भइरहेको बताउनुभयो । उहाँले प्रशिक्षण कार्यक्रमले सकारात्मक सन्देश दिएको उल्लेख गर्नुहुँदै यसले पार्टीलाई सुदृढ बनाउन सहयोग पुर्याउने बताउनुभयो ।
प्रशिक्षण कार्यक्रममा काँग्रेसका केन्द्रीय सदस्य रामजनम चौधरी, सुशिला भट्ट, प्रदेश सभापति वीर बहादुर बलायर लगायतले पार्टीलाई एकताबद्ध बनाएर लैजानु पर्नेमा जोड दिनुभयो ।
प्रशिक्षण कार्यक्रममा काँग्रेसका प्रदेश, जिल्ला, क्षेत्र तथा प्रदेश समितिका पदाधिकारी, जनप्रतिनिधि लगायतको सहभागिता रहेको थियो ।
प्रतिक्रिया राख्नुहोस्