वीरगंज नाकाबाट १० महिनामा २२ अर्ब ६० करोड बढीको धान, चामल, मकै र गहुँ  आयात

वीरगंज । मुलुकको प्रमुख भन्सार नाका वीरगंजको आईसिपी भन्सार हुँदै चालु आर्थिक वर्षको १० महिनामा २२ अर्ब ६० करोड १६ लाख ४२ हजार मूल्य बराबरको धान, चामल, मकै लगायतका खाद्यान्न भित्रिएको छ । 

वीरगंज भन्सार कार्यालयले उपलब्ध गराएको तथ्याङ्क अनुसार चालु आर्थिक बर्ष २०८०/८१ को साउन देखि वैशाख मसान्त सम्म ७ अर्ब ६४ करोड ४२ लाख ४७ हजार मूल्य बराबरको धान भित्रिएको छ भने सो अवधिमा १ अर्ब ५५ करोड ३३ लाख ८४ हजार मूल्य बराबरको चामल भित्रिएको छ ।

त्यसैगरी आईसिपी भन्सार नाकाबाट सो अवधिमा ७ अर्ब ६४ करोड ४२ लाख ४७ हजार मूल्य बराबरको मकै भित्रिएको वीरगंज भन्सार कार्यालयको तथ्याङ्कले देखाएको छ । यसैगरी वीरगंज नाकाबाट फापर, कोदोको पिठो लगायतका खाद्यान्न १ अर्ब ५५ करोड ३३ लाख ८४ हजार मूल्य बराबरको भित्रिएको छ भने गहुँ ४ अर्ब २० करोड ६३ लाख मूल्य बराबरको भित्रिएको छ । 

धान चामल, मकै र गहुँ लगायतका खाद्य सामग्रीबाट बीरगंज भन्सारले १ अर्ब २७ करोड २५ लाख २४ हजार राजस्व असुली गरेको बीरगंज भन्सार कार्यालयका प्रमुख भन्सार प्रशासक डिलाराम पन्थीले जानकारी दिनुभयो ।

गतवर्ष बीरगंज नाकाबाट सो अवधिमा १८ अर्ब ४३ करोड ८० लाख ३२ हजार मूल्य बराबरको धान, चाम, मकै, फापर कोदो तथा गहुँ लगायतका खाद्यान्न भित्रिएको र सो बापत १ अर्ब ७ करोड ३२ लाख ५१ हजार राजस्व असुली भएको भन्सार प्रशासक पन्थीले बताउनु भयो ।