अस्पताल बाजुरामा अक्सिजन अभाव
बाजुरा । जिल्ला अस्पताल बाजुरामा अक्सिजन अभाव भएको छ। अस्पतालमा रहेको अक्सिजन प्लान्ट मेसिनमा खराबी आएसँगै अक्सिजन अभाव भएको हो ।
प्लान्टमा खराबी आएपछि अस्पतालमा रहेका अक्सिजन सिलिण्डरहरु रित्तिएका जिल्ला अस्पताल बाजुराका सूचना अधिकारी नृपराज गिरीले बताउनुभयो ।
एक महिनादेखि अक्सिजन प्लान्ट बन्द भएको र हाल जिल्ला अस्पतालमा अक्सिजन लगाउनुपर्ने बिरामीहरूका लागि बयालपाटाबाट ल्याउनुपर्ने बाध्यता रहेको सूचना अधिकारी गिरीले जानकारी दिनुभयो ।
एक महिना अगाडी बिग्रीएको मेसिन मर्मतका लागि कम्पनीलाई पटक पटक बोलाउँदा पनि नआएको र अग्रिम भुक्तानी माग गरेका कारण मर्मतमा ढिलाइ भएको अस्पताल बाजुराले जनाएको छ ।
सुदूरपश्चिम प्रदेश सरकारको बजेट ढिला आएको र अस्पतालको आन्तरिक श्रोतबाट मर्मत गर्न नसकिने भएका कारण मर्मतमा ढिलाइ भएको अस्पताल बाजुराका प्रमुख सुमिता पुनले बताउनुभयो ।सुदूरपश्चिम सरकारको यस आर्थिक वर्षको बजेट कार्यान्वयनको पक्षमा भर्खर गएकोले दशै लगत्तै मर्मत गरिने अस्पताल प्रमुख पुनको भनाइ छ।
जिल्ला अस्पतालमै भर्ना भएर उपचारमा रहेका बिरामीहरूका लागि भने पाइपबाटै सिधै दिन मिल्ने भए पनि एम्बुलेन्स सहित रेफर गरिने बिरामीहरूका लागि निकै समस्या झेल्नु परेको अस्पताल बाजुराले जनाएको छ।
प्रतिक्रिया राख्नुहोस्