बाइडेन र नेतान्याहु बीच गाजामा सहायताका लागि क्रसिङ खोल्ने इजरायली योजनाबारे छलफल

वासिङ्टन। अमेरिकी राष्ट्रपति जो बाइडेन र इजरायली प्रधानमन्त्री बेन्यामिन नेतान्याहुबीच उत्तरी गाजा क्षेत्रमा मानवीय सहायतामा वृद्धि गर्ने उद्देश्यले थप क्रसिङ खोल्ने इजरायली अभिप्रायबारे टेलिफोन वार्ता भएको छ । 

सहायताका लागि उत्तरी गाजामा प्रवेश गर्न अनुमति दिन कर्नी र इरेज क्रसिङहरू इजरायलले गेट ९६ सँगसँगै पूर्णरूपमा खोल्ने तयारी गरेको छ । सम्भावित अनिकाल र डरका बीच गाजामा सहायताको निरन्तर आगमन सुनिश्चित गर्न थप क्रसिङ खोल्न आवश्यक छ । इजरायलले रफाहमा महत्त्वपूर्ण आक्रमणका साथ अगाडि बढेमा यसले विद्यमान मानवीय केन्द्रलाई गाजाको बाँकी भागबाट अलग गर्न सक्ने द टाइम्स अफ इजरायलले रिपोर्ट गरेको छ ।

ह्वाइट हाउसको विज्ञप्तिमा दुई नेताले रफाहमा सम्भावित इजरायली आक्रमण बारेमा छलफल हुँदा बाइडेनले आफ्नो स्पष्ट स्थिति दोहोर्‍याउनु भएको जनाइएको छ ।  

अमेरिकाले गाजाको दक्षिणी सहर रफाहमा शरण खोज्ने १० लाखभन्दा बढी प्यालेस्टिनीको पूर्ण सुरक्षाको ग्यारेन्टी गर्न असफल हुने कुनै पनि अपरेसनलाई समर्थन गर्न नसक्ने स्पष्ट पारेको छ । यसबाहेक टाइम्स अफ इजरायलका अनुसार अमेरिकी अधिकारीहरूले कुनै अपवादबिना रफाहमा भएको महत्त्वपूर्ण अपरेसनको निरन्तर विरोध गरेका छन् ।

बाइडेनले फोन वार्तामा गाजाको सहायतामा सुधारहरूको सम्बन्धमा मानवीय संस्थाहरूसँगको पूर्ण समन्वयमा यो प्रगति कायम राख्न र बढाउन आवश्यक रहेको कुरामा जोड दिनुभयो ।  

द्वन्द्वको समयमा मानवीय कामदारहरूको सुरक्षाको मुद्दा एक विवादास्पद मुद्दा भएको छ । इजरायली हवाई आक्रमणको परिणामस्वरूप वर्ल्ड सेन्ट्रल किचनका सात कामदारको मृत्यु भयो । त्यसै बेलादेखि इजरायलले द्वन्द्व निवारणका लागि आफ्ना केही संयन्त्रहरू बढाएको छ । फोन वार्तामा बाइडेनले गाजा सहायता वितरणका सुधारहरू स्वीकार गर्दै अमेरिकाले यस सन्दर्भमा तेल अभिवले आफ्नो प्रयासहरू अझ बढाउनुपर्ने स्थिति कायम राखेको  द टाइम्स अफ इजरायलले रिपोर्ट गरेको छ ।

उहाँहरूबीच गाजामा तत्काल युद्ध विरामसँगै बन्धकहरूको रिहाइ सुरक्षित गर्न चलिरहेको वार्ताको पनि समीक्षा भएको छ । “गाजाका जनताका लागि युद्धविराम र राहत सुनिश्चित गर्न हमासले आफ्ना नागरिकहरूलाई यथाशीघ्र रिहा गर्नुपर्ने १७ अन्य मुलुकका नेताहरूसँगको आफ्नो भनाइलाई राष्ट्रपतिले उद्धृत गर्नुभएको छ”, विज्ञप्तिमा भनिएको छ । 

नेतान्याहुसँगको कुराकानीमा राष्ट्रपति बाइडेनले यसै महिनाको प्रारम्भमा इरानको अभूतपूर्व क्षेप्यास्त्र र ड्रोन आक्रमण विरुद्ध सफल रक्षा गरेपछि इजरायलको सुरक्षाका लागि आफ्नो दृढ प्रतिबद्धतालाई पनि दोहोर्‍याउनुभयो   । रासस/एएनआई