बालसुधार गृहमा सुधार गरिने : मन्त्री चौधरी
काठमाडौँ । महिला बालबालिका तथा ज्येष्ठ नागरिक मन्त्री भगवती चौधरीले सरकारले देशैभरका बालसुधार गृहहरूमा देखिएका समस्या तत्काल समाधान गर्ने बताउनुभएको छ ।
प्रतिनिधिसभाको महिला तथा सामाजिक मामिला समितिको आज सिंहदरबारमा बसेको बैठकमा मन्त्री चौधरीले तत्काल आफै बालगृहहरूको अनुगमनमा जाने र त्यहाँ रहेका समस्या समाधानका लागि नीतिगत निर्णय गरिने प्रतिबद्धता जनाउनुभयो ।
महिला, बालबालिका, ज्येष्ठ नागरिक, अपाङ्गता भएका व्यक्तिलगायत सीमान्तकृत वर्गलक्षित कार्यक्षेत्र भए पनि सरकारले मन्त्रालयलाई न्यून बजेट छुट्याउने गरेको भन्दै मन्त्री चौधरीले यस आर्थिक वर्षदेखि बजेट वृद्धि गर्न पनि आफ्नो पहल रहने बताउनुभयो ।
बैठकमा सांसदहरुले सरकारले सञ्चालन गरेका ९ वटा बाल गृहहरूमा सरसफाइ, खानेपानी, शिक्षा, स्वास्थ्यलगायतका समस्यासँगै त्यहाँ रहेको बताउनुभयो ।
उहाँहरूले बालबिच्ज्याईका मुद्दामा दोषी ठहरिएर सुधार गृहमा राखिएका बालबालिकामा नकारात्मक धारणा वृद्धि भएकाले सरकारले तत्काल त्यसलाई सम्बोधन गर्नुपर्ने विचार व्यक्त गर्नुभयो ।
बालसुधार गृहहरू यातना गृहजस्तै देखिएको बताउँदै सांसदहरुले सरकारले उचित व्यवस्थापन नगर्दा सुधार गृहहरूमा झडपको अवस्था आइरहेको बताउनुभयो ।
प्रतिक्रिया राख्नुहोस्