२०७८ साल असोज ४ गते सोमबार

तपाईँ सुन्दै हुनुहुन्छः

राष्ट्रियसभा बैठक : शून्य समयमा सरकारको ध्यानाकर्षण

रेडियो नेपाल २०७८ साउन २० गते १६:१७

काठमाडौँ ।राष्ट्रियसभाका सदस्यहरूले शून्य समयमा कोभिड–१९ विरुद्धको खोप, मेलम्चीका बाढीपीडितलाई क्षतिपूर्ति, दार्चुलामा तुइन तर्ने क्रममा बेपत्ता भएकाका परिवारलाई न्याय तथा सुकुम्वासीका समस्या चाँडो समाधान गर्न सरकारसँग माग गरेका छन् ।

राष्ट्रियसभाको आजको बैठकमा सदस्यहरूले कोरोना महामारी बढ्दै गएकाले सबैलाई खोपको व्यवस्था गर्नुपर्ने, भूमिहीनलाई जग्गाको व्यवस्था गर्नुपर्ने, यात्रा गर्दा ट्याक्सी चालकले ठग्ने गरेकाले त्यसप्रति ध्यान दिन सरकारसँग माग गर्नुभयो ।

सांसद खिलकुमार विकले खोप आपूर्ति गरी सबैलाई व्यवस्थित रूपमा लगाउन सरकारसँग माग गर्नुभयो । वृद्धवृद्धाले लामो समयसम्म लाइनमा बस्नुपरेको भन्दै उहाँले त्यसलाई सहज बनाउन सुझाव दिनुभयो ।

सांसद उदया शर्मा पौडेलले काठमाडौँ उपत्यकामा ट्याक्सी चालकले ठग्ने गरेकाले उनीहरूलाई कारवाहीको दायरामा ल्याउनुपर्ने बताउनुभयो । ट्याक्सीमा यात्रा गर्दा मिटरमा भाडा दर निर्धारण गर्न उहाँले माग गर्नुभयो ।

सांसद कविता बोगटीले दार्चुलामा भारतीय सीमा सुरक्षा बल ९एसएसबी०ले तुइन काटेका कारण जयसिंह धामी बेपत्ता भएको घटनामा सरकारले भारतीय पक्षको पक्षपोषण गरेको आरोप लगाउनुभयो । बेपत्ता धामीको परिवारलाई उचित क्षतिपूर्ति उपलब्ध गराउन उहाँले सरकारसँग माग गर्नुभयो ।

सांसद कोमल वलीले राष्ट्र निर्माणमा कलाकारको उल्लेख्य भूमिका रहेको भन्दै कलाकारलाई पिर, मर्का परेका बेला राज्यले ध्यान दिनुपर्ने बताउनुभयो । कलाकार पल्पसा डङ्गोलको स्वास्थ्योपचारका लागि पहल गरिदिन उहाँले सरकारसँग माग गर्नुभयो ।

सांसद खिमलाल देवकोटाले सिन्धुपाल्चोकको मेलम्चीलगायत स्थानमा बाढीले अत्यधिक क्षति गरेकाले उनीहरूलाई सुरक्षित ठाउँमा बसोबासको व्यवस्था गर्न सरकारसँग माग गर्नुभयो ।

सांसद चक्रप्रसाद स्नेहीले देशभर लाखौँ सुकुम्वासी रहेको भन्दै उनीहरूलाई जग्गाको व्यवस्था गर्न सरकारलाई सुझाव दिनुभयो । सांसद जगप्रसाद शर्माले शैक्षिक मजदुर समस्यामा परेकाले उनीहरूको समस्या समाधान गर्न सरकारले पहल गरोस् भन्नुभयो ।

सम्बन्धित