मृत्युपछि स्थानीयले जलाए एक्साभेटर

धादिङ। गजुरी गाउँपालिका वडा-६, दरिङ्गाल खोलामा एक्साभेटरले बनाएको खाडलमा डुबेर दुई जनाको  मृत्यु भएको छ। खोलामा बालुवा झिक्न बनाएको पोखरीमा डुबेर गजुरी गाउँपालिका वडा-६, ठुलिफाट दरिङ्गाल खोलामा शनिबार बिहान १० बजे उनीहरूको ज्यान गएको हो।

सुमन तामाङ (२२) र भीम तामाङ (१८) खोलामा डुबेरे ज्यान गएपछि आक्रोशित स्थानीयले खोलामा रहेको तीनवटा स्काभेटरमा आगजनी गरेका हुन्। मृतक दुवैकाे गजुरी गाउँपालिका-७, किराञ्चाेकका स्थानीय हुन् ।

खोलामा डोजर लगाउन नपाउने भन्दै स्थानीयको आन्दोलनपछि प्रशासनले कडाइ गरे पनि राति अवैध रूपमा एक्साभेटर लगाउने गरिएको थियो। स्थानीयले अरू एक्साभेटरमा पनि तोडफोड गर्न थालेपछि प्रहरीले नियन्त्रणको प्रयास गरिरहेको छ।