मधेश पूर्ण खोप सुनिश्चितता भएको प्रदेश घोषणा
जनकपुरधाम । मधेश प्रदेश आजदेखि पूर्ण खोप सुनिश्चितता भएको प्रदेश घोषणा भएको छ । पछिल्लो एक सातामा धनुषा, महोत्तरीसहित तीन जिल्ला पूर्ण खोप सुनिश्चितता भएको जिल्ला घोषणा भएपछि मधेश प्रदेश आज भएको हो ।
![](https://onlineradionepal.gov.np/wp-content/uploads/2024/06/IMG20240628161246-1024x576.jpg)
मधेश प्रदेशका ८ जिल्ला तथा १ सय ३२ स्थानीय तह पूर्ण खोप सुनिश्चितता घोषणा भइसकेपछि विधिवत् रुपमा मधेश प्रदेश पूर्ण खोप सुनिश्चितता भएको प्रदेश घोषणा भएको प्रदेश खोप समन्वय समितिका सदस्य सचिव एवं मधेश प्रदेशका स्वास्थ्य निर्देशक डा. राजीव कुमार झाले जानकारी दिनुभयो ।
मधेश प्रदेश खोप समन्वय समितिको आयोजनामा भएको घोषणा कार्यक्रममा मधेश प्रदेशका स्वास्थ्य तथा जनसङ्ख्या मन्त्री शत्रुधन प्रसाद सिंह, राज्यमन्त्री केशव राय तथा मन्त्रालयका सचिव डा. प्रमोद कुमार यादवले संयुक्त रुपमा जनकपुरधाममा आयोजना गरिएको विशेष कार्यक्रमका पूर्ण खोप सुनिश्चितता भएको प्रदेशको रुपमा घोषणा गर्नुभयो ।
![](https://onlineradionepal.gov.np/wp-content/uploads/2024/06/IMG20240628143536-1024x576.jpg)
मधेश प्रदेशका १६ देखि २३ महिनाको कुनै पनि बालबालिकाहरू खोप लिनबाट वञ्चित नभएपछि पूर्ण खोप सुनिश्चितता भएको प्रदेशको रुपमा घोषणा भएको हो ।
कार्यक्रममा मधेश प्रदेशका स्वास्थ्य तथा जनसङ्ख्या मन्त्री शत्रुधन प्रसाद सिंहले मधेश प्रदेश पूर्ण खोप सुनिश्चितता भएको घोषणासँगै अब जन्मिने बालबालिका खोप लिनबाट वञ्चित नहोउन् भन्नेतर्फ ध्यान दिन आग्रह गर्नुभयो ।
मधेश प्रदेशका स्वास्थ्य तथा जनसङ्ख्या राज्यमन्त्री केशव रायले पूर्ण खोपको सुनिश्चिततासंगै यसको निरन्तरता दिनका लागि थप मेहनत गर्न आवश्यक भएको बताउनुभयो ।
प्रतिक्रिया राख्नुहोस्