नागरिकता बनाउने भन्दा राहदानी बनाउनेको सङ्ख्या धेरै
![](https://onlineradionepal.gov.np/wp-content/uploads/2024/07/pp-झापामा-नागरिकता-बनाउने-भन्दा-राहदानी-बनाउनेको-संख्या-धेरै.jpg)
झापा । आर्थिक वर्ष २०८०/८१ मा झापामा नागरिकता बनाउनेको भन्दा राहदानी बनाउनेको सङ्ख्या धेरै रहेको पाइएको छ ।
जिल्ला प्रशासन कार्यालय झापाको तथ्याङ्क अनुसार गत आर्थिक वर्ष २०८०/८१ मा १८ हजार चार सय ६५ जनाले नागरिकता बनाउँदा २५ हजार सात सय २७ जनाले राहदानी बनाएका छन् । गत आर्थिक वर्षको साउनदेखि असोजसम्म सबैभन्दा धेरैले राहदानी बनाएको देखिन्छ । तीन महिनामा झापामा छ हजार सात सय ७१ जनाले नागरिकता बनाउँदा आठ हजार ६३ जनाले राहदानी बनाएका छन् ।
यसैगरी कात्तिक देखि पौषसम्मको त्रैमासिक तीन हजार चार सय ७४ जनाले नागरिकता बनाउँदा चार हजार आठ सय ३६ जनाले राहदानी बनाएका छन् । यस्तै मागदेखि चैत बीचको त्रैमासिकमा तीन हजार तीन सय ७८ जनाले नागरिकता बनाउँदा छ हजार पाँच सय २३ जनाले राहदानी बनाएको तथ्याङ्क छ ।
यस्तै आर्थिक वर्ष ०८०/०८१ के अन्तिम त्रैमासिक वैशाखदेखि असार मसान्तसम्ममा चार हजार आठ सय ४२ जनाले राहदानी बनाएका छन् । यस्तै छ हजार तीन सय पाँच जनाले नागरिकता बनाएका छन् ।
गत आर्थिक वर्षमा नागरिकता बनाउनेको भन्दा राहदानी बनाउनेको सङ्ख्या सात हजार दुई सय ६२ जना बढी भयो । गत आर्थिक वर्षमा जिल्ला प्रशासन कार्यालय झापाले राहदानी दस्तुर मार्फत मात्रै १४ करोड ७३ लाख ६७ हजार सात सय रुपैयाँ सङ्कलन गरेको छ ।
प्रतिक्रिया राख्नुहोस्