जनताका आशा र अपेक्षालाई सम्बोधन हुने गरि सरकारले काम गरिरहेको छ: मन्त्री शर्मा
![](https://onlineradionepal.gov.np/wp-content/uploads/2024/06/448599081_809375821168635_8583551594705820504_n-1024x768.jpg)
धनगढी । सञ्चार तथा सूचना प्रविधि मन्त्री रेखा शर्माले सरकारले सुशासन, समृद्धि, सामाजिक न्यायका पक्षमा केन्द्रित भएर काम गरिरहेको बताउनु भएको छ । उहाँले जनताका आशा र अपेक्षालाई सम्बोधन हुने गरि सरकारले राम्रा काम गरिरहेको र त्यसले जनतालाई आशावादी बनाएको बताउनु भयो । मन्त्री शर्माले समयमै पाठ्यपुस्तक, मलखादको वितरण लगायतका कामलाई सरकारले ब्यस्थित ढङ्गले अघि बढाएको बताउनु भयो ।
प्रेस सेन्टर कैलालीद्वारा आज धनगढीमा आयोजित पत्रकार सम्मेलनमा मन्त्री शर्माले ललिता निवास प्रकरण, भुटानी शरणार्थी, सुन काण्ड लगायतमा अडिग भई सरकारले काम गरेको र त्यसले जोसुकै भएपनि सजाएको भागिदार हुन्छ भन्ने स्थापित गरेको बताउनु भयो । उहाँले सरकार भ्रष्ट्राचार, विकृति र विसङ्गतिका विरुद्ध निर्मम रुपमा अघि बढिरहेको बताउनु भयो । सरकार सूचना प्रविधि दशक अभियानको तयारीमा लागिपरेको उल्लेख गर्नुहुँदै मन्त्री शर्माले त्यसका लागि सरकारी कार्यदल बनाएर १० बर्से गुरुयोजना निर्माण गरिने बताउनु भयो । उहाँले सूचना प्रविधि दशक अभियानले निजी क्षेत्र उत्साहित भएको र सूचना प्रविधिलाई व्यवस्थित बनाउन सकिए अर्वौ राजस्व भित्र्याउन सकिने बताउनु भयो । मन्त्री शर्माले मिडिया काउन्सिल ऐन संसदमा रहेको र सामाजिक सञ्जाल सम्बन्धि विधेयक, आमसञ्चार विधेयक दर्ता प्रक्रियामा रहेको तथा दूर सञ्चार ऐनको ड्राफ्ट तयार भएको बताउनु भयो । उहाँले आमसञ्चार सम्बन्धी सबै विधेयक, कानुन पारित भएमा पत्रकारिता क्षेत्रमा पुनर्संरचना हुने विश्वास ब्यक्त गर्नुभयो ।
सरकारले विपद् व्यवस्थापनका लागि पूर्व तयारीको काम गरिरहेको र सञ्चारमाध्यम मार्फत विपद् सचेतना सामाग्री प्रसारणको व्यवस्था सरकारले गरेको उहाँले बताउनु भयो ।
![](https://onlineradionepal.gov.np/wp-content/uploads/2024/06/448599081_809375821168635_8583551594705820504_n-1-1024x768.jpg)
सञ्चारकर्मीको जिज्ञासामा मन्त्री शर्माले बजेटका कारण सरकार तलमाथि हुँदैन, त्यो सम्भावना छैन, वर्तमान गठबन्धन राजनीतिक स्थायित्व दिने गरि पूरै अवधि लैजाने सहमति भएको बताउनु भयो । सरकार बजेट निर्माणको प्रक्रिया छ, विनियोजनमाथि छलफलमा छ, त्यसैले बजेट चाडै पारित हुने उहाँले बताउनु भयो । उहाँले बजेटमा देखिएका कमीकमजोरीलाई सुधार (परिमार्जन) गर्न प्रयत्न गरिने बताउनु भयो । सञ्चारकर्मीको अर्को जिज्ञासामा मन्त्री शर्माले राजदूत लगायतका नियुक्ति सरकारको नियमित प्रक्रिया भएकाले त्यो स्वभाविक भएको उल्लेख गर्नुहुँदै त्यसलाई बजेटसँग जोड्न उपयुक्त हुँदैन भन्नुभयो ।
सत्ता साझेदार दल नागरिक उन्मुक्ति र जनमत पार्टीलाई सरकारमा सहभागी गराउने कुरा हो, त्यसमा प्रधानमन्त्रीज्युले आवश्यकता बमोजिम मन्त्रीमण्डल विस्तार गर्नुहुन्छ, मन्त्री फिर्ता बोलाउने भन्ने होइन, त्यसबारे सरकार र पार्टीमा छलफल पनि भएको छैन, उहाँले भन्नुभयो ।
मन्त्री शर्माले सामाजिक सूचना सन्देश प्रवाहका क्षेत्रमा चलचित्र क्षेत्र महत्पूर्ण प्रभावकारी माध्यम भएकाले सरकारले शारीरिक रुपमा अपाङ्गता भएका कला क्षमता भएकाहरूलाई कला क्षेत्रमा जोड्ने गरि सरकार लागिपरेको बताउनु भयो ।
प्रतिक्रिया राख्नुहोस्