४२ डिग्रीको गर्मीमा आरन चलाउँदै मणिराम, दैनिक आम्दानी २ हजार माथि
बाँके । तिन दशक विदेशी भूमिका पसिना बगाउनुभएका बाँके जिल्ला कोहलपुर–७ सल्यानी टोलका मनिराम कामि कामले काेही सानो ठुलो नहुने बताउनुहुन्छ।
![](https://onlineradionepal.gov.np/wp-content/uploads/2024/05/IMG_20240519_144951.jpg)
उमेरले ५५ बर्ष पुग्नु भएका मणिरामले न गर्मी न पानी केहीको प्रवाह नगरेरै पुर्खौली पेशा सम्हाल्दै आउनुभएको छ। पछिल्लो समय नयाँ नयाँ प्रविधि भित्रिएसँगै यो पेशा लोप हुँदै गइरहेको छ। तर, मणिरामले परम्परागत पेशाबाट नै दैनिक २ हजार देखि २ हजार ५ सयसम्म कमाउँदै जीविकोपार्जन गरिरहनुभएको छ।
![](https://onlineradionepal.gov.np/wp-content/uploads/2024/05/IMG_20240519_145105-1-1024x567.jpg)
धेरै मेहनत भए पनि कम आम्दानी हुन थालेपछि गाउँका अरू कोही कालापहाड भारत, कोही बिदेसिएसँगै लोप हुने अवस्थामा पुगेको पेशा आफूले धान्दै आएको उहाँले बताउनुभयो । गाउँमा हँसिया, बन्चरो जस्ता हतियार बिस्तारै लोप हुँदै गए पनि आफूले अहिलेसम्म यस्ता हतियार बनाइरहेको उहाँको भनाइ छ ।
अहिले सल्यानी टोल र आसपास गाउँका मानिसहरू हतियार अर्चाप्ने तथा बन्चरो, खुँडा र दाउ बनाउन मणिरामलाई खोज्दै आउँछन् । वडामा मनिराम नै आरनमा काम गर्ने एक्लो व्यक्ति हुनुहुन्छ ।
![](https://onlineradionepal.gov.np/wp-content/uploads/2024/05/IMG_20240519_145049.jpg)
मनिराम आफ्नो पेशाबाट पूर्ण रुपमा सन्तुष्ट हुनुहुन्छ । पछिल्लो समय आधुनिक मेसिनबाट बनेका हतियारका तुलनामा आफूले निर्माण गरेका हतियारको आकर्षण केही मात्रामा कमी हुने उहाँको भनाई छ।
उहाँले खुर्पाको मूल्य ३ हजार, खुँडाको मूल्य ४ हजार कायम गर्नुभएको छ। उहाँले बनाएका हतियार घरबाटै विक्री हुने गर्दछ । पछिल्लो समय आरने पेशाबाट केही हुँदैन भनेर युवाहरू विदेश पलायन भइरहेको बेला मणिरामले भने त्यही काम गरेर आफ्नो घर परिवारको गुजरा चलाइरहनुभएको छ।
![](https://onlineradionepal.gov.np/wp-content/uploads/2024/05/IMG_20240519_145030.jpg)
विदेशबाट फर्किएर पनि आफ्नो पुर्खौली पेशा अँगाल्न पाउँदा आफूलाई गर्व लाग्ने गरेको उहाँले बताउनुभयो । परम्परागत पेशालाई टिकाउन र बजारीकरणका लागि स्थानीय सरकारले सहयोग गरे पेशा दिगो रुपमा टिकाउन सजिलो हुने उहाँको भनाई छ।
प्रतिक्रिया राख्नुहोस्