प्रदेशको अधिकार र भइरहेका गतिविधिका सम्बन्धमा सरकारको ध्यानाकर्षण
काठमाडौँ । राष्ट्रियसभाको आजको बैठकमा सांसदहरुले प्रदेशको अधिकार र भइरहेका गतिविधिका सम्बन्धमा सरकारको ध्यानाकर्षण गराउनुभएको छ ।
बैठकको प्रादेशिक सरोकार समयमा आफ्ना धारणा राख्दै सांसद गोपी बहादुर सार्की अछामीले कोशी प्रदेशमा धार्मिक तीर्थस्थल, पर्यटकीय स्थललाई विकास गर्दै समृद्ध प्रदेशका रुपमा स्थापित गर्नुपर्ने बताउनुभयो ।
सांसद नारायणदत्त भट्टले सुदूरपश्चिम प्रदेशलाई अगाडि ल्याउन खप्तड क्षेत्रको विकास गर्दै भाषा संस्कृतिमा सरकारले ध्यान दिनुपर्ने बताउनुभयो ।
यसैगरी, सांसद तुलसा कुमारी दाहालले महिलाका लागि क्षमता विकास योजना ल्याइनुपर्ने, भूमिहीन दलितलाई आवासको व्यवस्था गरिनुपर्ने, मधेश प्रदेशमा सडक मानवको अवस्था चुनौतीपूर्ण रहेकाले उचित व्यवस्थापन हुनुपर्ने भन्दै सरकारको ध्यानाकर्षण गर्नुभयो ।
सांसद गोमा देवी तिमल्सिनाले सडक दुर्घटनालाई रोक्न संघ, प्रदेश र स्थानीय तहले आ–आफ्नो जिम्मेवारी पुरा गर्नुपर्ने, जङ्गली जनवारबाट मानिसलाई जोगाउनुपर्ने, बफर जोनमा बसेका नागरिकलाई व्यवस्थापन गर्नुपर्ने भन्दै सरकारको ध्यानाकर्षण गराउनुभयो ।
बैठकमा सांसद मायाप्रसाद शर्माले कृषि उपजको उत्पादन र बिक्री वितरणलाई प्रोत्साहन गरि पर्यटकीय क्षेत्रको पहिचान र खानी व्यवस्थापनमार्फत कर्णाली प्रदेशलाई समृद्ध बनाउन सकिने बताउनुभयो ।
बैठकमा सांसद मोहमद खालिद, शेखर कुमार सिंह, रेणु चन्द लगायतका सांसदहरुले प्रदेशलाई व्यवहारिक रुपमा अधिकार सम्पन्न तुल्याउनु पर्ने बताउनुभयो ।
सभामा आगामी आर्थिक वर्ष २०८१/०८२ का लागि विनियोजन विधेयकका सिद्धान्त र प्राथमिकतामाथि छलफल जारी छ
प्रतिक्रिया राख्नुहोस्