‘राजनीतिप्रति सकारात्मक सोच ल्याउन जनतामाझ पुग्नै पर्ने’

लेखनाथ (कास्की) । नेकपा (एमाले)का उपमहासचिव प्रदीप ज्ञवालीले नेपालको राजनीतिप्रति आमजनताको सोच सकारात्मक बनाउन उनीहरूका आवश्यकता बुझेर दलहरू अगाडि बढ्नुको विकल्प नरहेको बताउनुभएको छ । 

प्रेस चौतारी कास्कीद्वारा आज पोखरामा आयोजित पत्रकार भेटघाट कार्यक्रममा उहाँले नेपालमा राजनीतिक अस्थिरता आउन नदिन गणतन्त्रवादी शक्ति चनाखो हुनुपर्नेमा जोड दिनुभयो । 

“वर्तमान अवस्थामा देशमा सामाजिक सद्भाव कायम गर्न त्यति नै आवश्यकता देखिएकाले दलहरू सचेत भएर त्यसतर्फ पनि ध्यान दिन जरुरी छ”, नेता ज्ञवालीले भन्नुभयो, “विभिन्न जातजाति, धर्म, संस्कृति मिलेर बसेको देशमा सामाजिक सद्भाव बिग्रन दिनु हुँदैन ।”

केही वर्ष अघि मात्र द्वन्द्वबाट शान्ति प्रक्रियामा अगाडि बढेको देश नेपालमा पुनः द्वन्द्वको अवस्था आउन नदिन दलहरूले सोच्न जरुरी भएको उल्लेख गर्दै नेता ज्ञवालीले सङ्क्रमणकालीन न्यायका पक्षमै रहेकाले शान्ति प्रक्रियाका हरेक गतिविधिमा सरकारलाई एमालेको सहयोग रहने प्रतिबद्धता व्यक्त गर्नुभयो । 

अवसरको खोजीमा युवा विदेश पलायन हुँदा नेपालका गाउँ बस्ती शून्य बन्दै गएकाले युवालाई नेपालमै रहने वातावरण बनाउन सरकारले युवालक्षित विभिन्न किसिमका कार्यक्रम ल्याउन जरुरी भएकामा उहाँले जोड दिनुभयो ।