बिपी साहित्य सम्मान राजेन्द्र बिमल र बिपी सेनानी सम्मान डिल्लिरमण शर्मालाई प्रदान
काठमाडौँ । यस वर्षको बिपी साहित्य सम्मान साहित्यकार राजेन्द्र बिमल र बिपी सेनानी सम्मान डिल्लिरमण शर्मालाई प्रदान गरिएको छ ।
बिपी कोइरालाको ११० औँ जन्मजयन्तीका अवसरमा राष्ट्रपति कार्यालय शीतल निवासमा आज आयोजित कार्यक्रममा राष्ट्रपति रामचन्द्र पौडेलले बिपी साहित्य सम्मानबाट जनकपुरका बिमल र बिपी सेनानी सम्मानबाट रुपन्देहीका शर्मालाई सम्मान गर्नुभयो ।
साहित्य सम्मान पुरस्कारको राशि रु एक लाख एक हजार र प्रजातन्त्र सेनानी सम्मानको पुरस्कार रु ५१ हजारको रहेको छ ।
जननायक बिपी कोइराला स्मृति ट्रस्टले प्रत्येक वर्ष बिपी जयन्तीका अवसरमा बिपी साहित्य सम्मान र बिपी सेनानी सम्मान पुरस्कार प्रदान गर्दै आएको छ ।
कार्यक्रममा राष्ट्रपति रामचन्द्र पौडेलले लोकतन्त्रप्रतिको बिपीको विचार आज पनि उत्तिकै सान्दर्भिक रहेको बताउनुभयो ।
राष्ट्रपति पौडेलले बिपीको समानताको सिद्धान्तलाई मूर्तरूप दिने ठोस दृष्टिकोणको सान्दर्भिकता आज पनि रहेको धारणा राख्नुभयो ।
राष्ट्रपति पौडेलले जनतालाई सार्वभौम अधिकार सम्मानपन्न बनाउन बिपीले खेलेको भूमिकाको प्रशंसा गर्नुहुँदै बिपी साहित्य र राजनीतिको अनुपम पुञ्ज भएको बताउनुभयो ।
कार्यक्रममा ट्रस्टका महासचिव रामचन्द्र पोखरेलले ट्रष्टको काम र आगामी कार्य दिशाबारे जानकारी दिनुभयो ।
कार्यक्रममा सम्मानित व्यक्तित्व साहित्यकार राजेन्द्र विमलले राजनीतिमा देखिएको विकृति अन्त्यका लागि बिपीको मार्गदर्शनलाई पहिल्याउँदै अगाडि बढ्नुपर्ने धारणा राख्नुभयो ।
प्रतिक्रिया राख्नुहोस्