सांसदहरूले लम्पी स्कीन रोगबाट पशुचौपायाहरु सङ्क्रमित हुँदै गएकोप्रति सरकारको ध्यानाकर्षण
काठमाडौँ I प्रतिनिधिसभाको आजको बैठकमा सांसदहरूले केही महिनादेखि लम्पी स्कीन रोगको प्रकोपबाट पशुचौपायाहरु सङ्क्रमित हुँदै गएकोप्रति सरकारको ध्यानाकर्षण गराउनुभएको छ ।
प्रतिनिधिसभाको बैठकमा सांसदहरूले गत फागुन महिनादेखि हालसम्म आठ लाख पशुचौपायाहरु लम्पी स्कीन रोगबाट सङ्क्रमित भएको र २७ हजार चौपायाहरूको मृत्यु भएकोले सरकारले उपचार, खोप र औषधीको व्यवस्था मिलाउन सरकारको ध्यानाकर्षण गराउनुभएको हो ।
बैठकमा सांसदहरूले जातीय विभेदका घटनाहरू बढ्दै गएकोले सचेतना कार्यक्रमहरू गर्नुपर्ने र जातीय भेदभाव तथा छुवाछुत कसुर सजाय ऐन २०६८ लाई निर्भिक कार्यान्वयनका लागि जोड दिनुभयो ।
मिटरब्याज अध्यादेश आउनुपर्नेमा जोड दिनुहुँदै सांसदहरूले फास्ट ट्र्याकबाट मिटरव्याजका पीडितहरूलाई न्याय दिलाउने पक्ष सरकार उभिनुपर्ने बताउनुभयो ।
किसानहरूको समस्यालाई समाधान गर्न सरकारले तदारुकता देखाउनुपर्ने र सिचाँईको व्यवस्था मिलाउन सरकार गम्भीर भएर लाग्नुपर्ने सांसदहरूले जोड दिनुभयो ।
ललिता निवास जग्गा प्रकरणमा निर्णयकर्ताहरुलाई पनि समातेर छानबिन गर्नुपर्नेमा सांसदहरूले जोड दिनुभयो ।
केही दिनयता अविरल वर्षाका कारण आएको बाढीले गर्दा सर्वसाधारणहरूको घरहरू डुबानमा परेका हुनाले सरकारले राहत र उद्धारको व्यवस्था मिलाउन सरकारको ध्यानाकर्षण गराएको छ ।
प्रतिनिधिसभाको बैठक जारी रहेको छ ।
प्रतिक्रिया राख्नुहोस्