निवर्तमान सभापति बिकास लामाको निधन
सिन्धुपाल्चोक । नेपाली काँग्रेस सिन्धुपाल्चोकका निवर्तमान सभापति बिकास लामाको निधन भएको छ । लामो समयदेखि क्यान्सर पीडित ६४ वर्षीय लामाको उपचारकै क्रममा शुक्रबार राती काठमाडौँको वीर अस्पतालमा निधन भएको हो ।
विद्यार्थीकाल देखिनै नेपाली काँग्रेसको राजनीतिमा सक्रिय भूमिका निर्वाह गर्दै आएका लामा तेह्रौँ महाधिवेशनमा नेपाली काँग्रेस सिन्धुपाल्चोकको सभापतिमा निर्वाचित हुनुभएको थियो । नेपाली काँग्रेसमा एउटा सादगी नेताको रुपमा परिचित लामा काँग्रेसको चौधौँ महाधिवेशनमा सह महामन्त्रीका प्रत्याशी हुनुहुन्थ्यो ।
लामाको पार्थिव शरीरलाई अन्तिम श्रद्धाञ्जलीकालागी शनिबार दिनभर काठमाडौँ बौद्ध तिनचुलीस्थित ह्योल्मो गुम्बामा राखिने र आइतबार दाह संस्कार गरिने नेपाली काँग्रेस सिन्धुपाल्चोकका सभापति जङ्ग बहादुर लामाले जानकारी दिनुभयो ।
मृतक लामाको एक श्रीमती दुई छोरा र चार छोरी छन् । उहाँकी कान्छी श्रीमतीको भने यस अघीनै मृत्यु भइसकेको छ ।
प्रतिक्रिया राख्नुहोस्