आधुनिक गीत प्रतियोगिताका उत्कृष्ट गायक, गीतकार र सङ्गीतकार सम्मानित

काठमाडौँ । रेडियो नेपालले आफ्नो ७३ औँ वार्षिकोत्सवको अवसरमा आयोजना गरेको राष्ट्रव्यापी आधुनिक गीत प्रतियोगितामा प्रथम, द्वितीय र तृतीय हुन सफल गायक, गायिका तथा उत्कृष्ट गीतकार र सङ्गीतकारलाई पनि नगद तथा प्रमाणपत्रद्वारा सम्मान गरेको छ ।

आधुनिक गीत प्रतियोगितामा कास्कीकी ममता गुरुङले गायन तर्फ प्रथम स्थान हासिल गर्नु भएको थियो । गुरुङले श्वेता मैनालीको शब्द रचना र शङ्कर थापा स्माइलको सङ्गीत रहेको तारा टिपेर माला लाउँछु बोलको गीत गाउनुभएको थियो ।

प्रतियोगितामा पाँचथरकी मुना ठटालले द्वितीय स्थान हासिल गर्न सफल हुनुभएको थियो । ठटालले डिपी खनालको शब्द रचना र शङ्कर थापा स्माईलको सङ्गीत रहेको कति लाए मनमा मल्हम बोलको गीत गाउनुभएको थियो

त्यस्तै भक्तपुरका सरोज परियारले तृतीय स्थान हासिल गर्न सफल हुनु भएको थियो । परियारले पनि डिपी खनालको शब्द रचना र थापाकै सङ्गीत रहेको बन्द भो त्यो आवाज बोलको गीत गाउनुभएको थियो ।

प्रतियोगितामा उत्कृष्ट गीतकार घोषणा हुनुभएकी श्वेता मैनाली र उत्कृष्ट सङ्गीतकार घोषित हुनुभएका खड्ग गन्धर्वलाई समेत नगद, प्रशंसापत्रद्वारा सम्मान गरिएको छ ।