अन्तर संस्था कप फुटबलको उपाधि नेर्पा स्पोर्टस क्लब

खोटाङ। दिक्तेलस्थित माटीकोरे खेलमैदानमा सम्पन्न ‘प्रथम अन्तर संस्था कप फुटबल प्रतियोगिता २०७९’को उपाधि नेर्पा स्पोर्टस क्लब नेर्पाले उचालेको छ । खोटाङ फुटबल एकेडेमी (केएफए)ले आयोजना गरेको सो प्रतियोगितामा आयोजक केएफएलाई शून्यका बिरुद्ध एक गोल गर्दै  नेर्पाले प्रथम उपाधि हासिल गरेको हो । 

प्रतियोगिताको पहिलो हाफको ३० औँ मिनेटमा नेर्पाका खेलाडी युवराज राईले गर्नुभएको गोल नै निर्णायक भएको थियो । जिल्लाका २२ संस्थाले सहभागिता जनाएको प्रतियोगितामा साकेला गाउँपालिका तेस्रो भएको छ । 

प्रतियोगितामा प्रथम हुने क्लबले नगद रु ४४ हजार चारसय ४४, दोस्रो हुनेले रु २२ हजार दुईसय २२ तथा तेस्रो हुनेले रु ११ हजार एकसय ११ का साथमा ट्रफी, मेडल र प्रमाणपत्र प्रदान गरिएको आयोजकले जनाएको छ । विजयी खेलाडीलाई साकेला गाउँपालिका प्रमुख रविप्रकाश राई र जिल्ला फुटबल सङ्घ खोटाङका अध्यक्ष ध्रुवविक्रम राईले संयुक्त रुपमा नगद पुरस्कार तथा ट्रफी प्रदान गर्नुभएको छ ।  

प्रतियोगिता अवधिभरका उत्कृष्ट खेलाडीमा नेर्पाका युवराज राई, उत्कृष्ट गोल रक्षकमा केएफएका सुरेश राई, सर्वाधिक गोलकर्तामा जिल्ला फुटबल सङ्घका सोनित राई, उत्कृष्ट प्रशिक्षकमा नेर्पाका सरोज गुरुङ र उत्कृष्ट मिड फिल्डरमा नेर्पाका अविरल राई र उत्कृष्ट डिफेन्डरमा केएफएका भीषण राई घोषित भएका छन् । उनीहरुलाई नगद रु दुई हजारको साथमा ट्रफी, मेडल र प्रमाणपत्र प्रदान गरिएको आयोजक केएफएका महासचिवमा सैलेन्द्र बजिमयले बताउनुभयो । 

प्रतियोगिताको प्रथम पुरस्कार मनोज स्मृति प्रतिष्ठान दिक्तेलले प्रायोजन गरेको थियो ।  समापन कार्यक्रममा नेपाल पत्रकार महासङ्घ जिल्ला शाखा खोटाङलाई प्रदान गर्ने भनिएको रु पाँच हजार राशीको ‘केएफए पत्रकारिता पुरस्कार’ भने अर्को कार्यक्रमको अवसरमा प्रदान गर्ने जनाइएको छ । 

प्रतियोगिताबाट आठ संस्था छनौट गरेर सुपर लिग फुटबल प्रतियोगिता सञ्चालन गरिने आयोजक केएफएका अध्यक्ष नूरकाजी सैँजूले जानकारी दिनुभयो । फुटबल खेलको समग्र विकास गर्ने उद्देश्यले स्थापना भएको केएफएले जिल्लाका खेलाडीलाई निःशुल्क प्रशिक्षण तथा विभिन्न प्रतियोगिता सञ्चालन गर्दै आएको छ ।

बिगत तीन वर्षदेखि निरन्तर तालिम गराउँदै आएको एकेडेमीबाट गत वर्षमात्रै एन्फामा सात जना खेलाडी पठाइएको प्रशिक्षक रोशेष श्रेष्ठले बताउनुभयो । “एकेडेमीमा बिना शुल्क तालिम दिने गरिएको छ”, उहाँले भन्नुभयो, “हामीले तालिम दिएको खेलाडीहरु अहिले विभिन्न क्लब तथा ठाउँमा गएर स्थापित भएका छन् ।”
यसअघि एकेडेमीमा तालिम लिएका याम्खाका एवन बस्नेत हाल नेपाल पुलिस क्लबमा आवद्ध छन् । जिल्लामा फुटबल खेलको व्यवसायिक विकासमा लागेको एकेडेमीलाई गोल नेपाल र लिभरपुल फ्यान्स् नेपालले खेल सामग्री उपलब्ध गराउँदै आएको छ ।

एकेडेमीले उत्पादन गरेको खेलाडीलाई छात्रवृत्तिमा थप अध्ययन तथा तालीमका लागि राजधानी काठमाडौँ पठाउने गरिएको छ । गत वर्ष सात जना खेलाडीलाई कक्षा ११ र १२ अध्ययन तथा तालिमको सम्पूर्ण खर्च सम्बन्धित क्याम्पसले बेहोर्नेगरि काठमाडौँको नयाँ बानेश्वरस्थित प्रिमियर कलेजले लगेको छ ।