बाँकेका कोभिड डेडिकेटेड अस्पतालहरूमा ७७ प्रतिशत शय्या खाली

नेपालगन्ज । बाँकेका कोभिड डेडिकेटेड अस्पतालहरूमा ७७ प्रतिशत शय्या खाली भएका छन् । कोभिड उपचारका लागि जिल्लाका चार वटा अस्पतालमा छुट्टाइएका ३ सय ६१ शय्यामध्ये २ सय ६४ शय्या खाली भएको जिल्ला कोभिड-१९ सङ्कट व्यवस्थापन केन्द्र बाँकेले जनाएको छ ।

एक महिना अघिसम्म कोभिड सङ्क्रमितले बाँकेका अस्पतालहरू भरिभराउ थिए । अक्सिजन र बेड नपाएरै बिरामीले ज्यान गुमाउनुपरेको थियो । तर, अस्पतालमा अहिले ८२ जना मात्र बिरामी छन् । २५ वैशाखपछि संक्रमित बिरामीको सङ्ख्या क्रमशः घट्न थालेको हो । २ सय शय्या छुट्टाइएको भेरी अस्पतालमा ६५ बिरामी छन् । ती मध्ये १८ जना सिकिस्त छन् । यस्तै १ सय ३० शय्या छुट्टाइएको मेडिकल कलेजमा १६ बिरामीको उपचार भइरहेको छ ।

ती मध्ये १४ जना सिकिस्त छन् । त्यस्तै, शल्यक्रिया गर्नुपर्ने अवस्थाका सङ्क्रमितका लागि १६ शय्या छुट्टाइएको वेष्टर्न हस्पिटलमा एक जना मात्र बिरामी छन् । यस्तै युनाइटेडका १५ शय्या मध्ये सबै खाली छन् । स्थानीय तहले खोलेका १६ आइसोलेसन केन्द्र मध्ये चार वटामा १६ सामान्य अवस्थाका संक्रमित छन् ।