पूर्वसभामुख महरा पत्नी सिताको निधनमा प्रधानमन्त्रीद्धारा दुःख व्यक्त

काठमाडौँ-  प्रधानमन्त्री केपी शर्मा ओलीले पूर्वसभामुख तथा प्रतिनिधि सभा सदस्य कृष्णबहादुर महराकी पत्नी सीता महराको निधनमा दुःख व्यक्त गर्नुभएको छ ।  प्रधानमन्त्री ओलीले ट्वीटमार्फत उहाँप्रति श्रद्धाञ्जलि अर्पण गर्दै शोकसन्तप्त परिवारजनमा समवेदना व्यक्त गर्नुभएको छ ।

प्रधानमन्त्रीले कोराना सक्रमणका कारण आज विहान नर्भिक अस्पत्तालमा भएको निधनको खबरले आफूलाई अत्यन्त दुःख लागेको बताउनुभएको छ । उहाँले पत्नीशोकमा रहनुभएका पूर्वसभामुख तथा प्रतिनिधि सभा सदस्य कृष्णबहादुर महरा  तथा परिवारमा गहिरो समवेदना प्रकट गर्नुभएको छ ।

निमोनिया र स्वासप्रश्वासको समस्या देखिएपछि कार्तिक १४ गते शुक्रबार हेलिकोप्टरबाट काठमाडौं ल्याई नर्भिक हस्पिटलमा भर्ना गरिएको थियो।

पीसीआर जाँचको क्रममा कोरोना पोजेटिभ देखिएकी उहाँको १५ गतेदेखि भेन्टिलेटरमा राखेर उपचार गर्ने क्रममै आज बिहान ६ः२५ बजे निधन भएको अस्पतालले पुष्टि गरेको छ।

उहाँ विगत १० वर्षदेखि माइस्थेनिया नामक रोगबाट  पीडित रहेको महरा परिवारले जनाएको छ । गएको दशैंमा पुर्ख्यौली घर रोल्पा मेबाङ गएको बेला स्वास्थ्यमा सामान्य समस्या देखिएपछि उहाँलाई कार्तिक १३ गते दाङस्थित गोर्खा अस्पतालमा भर्ना गरिएको थियो।

प्रहरीको घेरा तोडेर भागेपछि भूमिगत

सीता महरा वि.सं. २०१८ साउन १३ गते शुक्रबार बुवा मुक्तबहादुर थापा र आमा खिर्मादेवी थापाको कोखबाट रोल्पाको गजुल धौलेगाउँमा पहिलो सन्तानको रुपमा जन्मनुभएको हो ।

कृष्णबहादुर महरासँगै २०३५ सालमा विवाह भएको उहाँका दुई छोरा र दुई छोरी रहेका छन्।

महरा भूमिगत भएपछि तत्कालीन सरकारले धेरैपटक शारिरीक मानसिक यातना दिनुका साथै केही दिन हिरासतमा पनि लिएको थियो।

२०५४ साउन २९ गते राती रोल्पा मेबाङस्थित घरमै आएर नाबालक छोराछोरीलाई घरमा थुनेर गिरप्तार गर्न थालेपछि उनी प्रहरीको घेरा तोडेर भाग्नुभएको थियो ।

त्यसपछि घरभित्र थुनिएका छोराछोरी पनि घरपछाडिको ढोकाबाट भागेर बाँचेका थिए। त्यहीँ दिनदेखि घर छोडेका महरा परिवार नै पूर्णकालीन कार्यकर्ताको रुपमा जनयुद्धमा सहभागी भएका थिए।

सामान्य लेखपढ मात्रै गर्न जानेकी सीता महरा तत्कालीन माओवादीको ठूलो जिम्मेवारीमा नरहे पनि कृष्णबहादुर महरालाई नजिकबाट पारिवारिक तथा पार्टी राजनीतिमा पनि सहयोग गर्नुभएको थियो ।