नर्वेका सांसदको टोलीद्वारा नेपालको अन्तर्राष्ट्रिय सम्बन्ध तथा पर्यटन समितिसँग छलफल

काठमाडौँ । नर्वेका सांसदहरूको एक टोलीले प्रतिनिधिसभाको अन्तर्राष्ट्रिय सम्बन्ध र पर्यटन समितिसँग सिंहदरबारमा आज छलफल गरेको छ । दुई देशका संसदीय समितिबिच पहिलोपटक छलफल भएको पर्यटन समितिका सभापति राजकिशोर यादवले बताउनुभयो । उहाँले संसदीय कूटनीतिका रुपमा भ्रमण र भेटघाट भएको उल्लेख गर्नुभयो ।

छलफलमा दुवै संसदीय टोलीका सदस्यहरुले नेपाल र नर्वेबीचको मैत्रीपूर्ण र सुमधुर सम्बन्ध तथा सहकार्यबारे चर्चा गरेका थिए । बैठकमा संसदीय शासन प्रणालीको सञ्चालन, लोकतान्त्रिक प्रक्रिया तथा साझा विश्वव्यापी एजेन्डाका लागि सहकार्य गर्नेबारे कुराकानी भएको थियो । लोकतन्त्र, मानवअधिकार र सामाजिक न्यायका साझा मूल्यमान्यतामा मिलेर काम गर्ने प्रतिबद्धता दुवै देशका सांसदहरुले व्यक्त गरेका छन् ।  

जलवायु परिवर्तनका प्रभावहरूको न्यूनीकरण र दिगो विकास लक्ष्य हासिल गर्न अन्तर्राष्ट्रिय मञ्चहरूमा सहकार्य गर्ने सहमति नेपाल र नर्वेबीच भएको छ । त्यस क्रममा सभापति यादवले नेपालको सङ्घीय संसद्को गठन प्रक्रिया, सङ्ख्या तथा संसदीय समितिहरूको काम र क्षेत्राधिकारबारे भ्रमण टोलीलाई जानकारी दिनुभएको थियो । उहाँले नेपालको संसद्मा जनताका आवाजले ठाउँ पाउनुका साथै त्यहाँ उठेका सवालहरूको सम्बोधन गर्ने गरिएको बताउनुभयो ।  

नर्वेका पूर्वविदेशमन्त्री, रक्षामन्त्रीसमेत रहनुभएकी सांसद इने म्यारी एरिक्सन सोरेइडको नेतृत्वमा १४ सदस्यीय टोली नेपाल भ्रमणमा आएको छ । कञ्जरेभेटिभ पार्टीकी सांसद उहाँले सन् २०१३ देखि ०१७ सम्म रक्षा र सन् २०१७ देखि २०२१ सम्म विदेशमन्त्रीको जिम्मेवारी सम्हाल्नुभएको थियो । रासस