प्रतिनिधिसभा बैठक सुरु 

काठमाडौँ । प्रतिनिधिसभाको आजको बैठक सुरु हुनासाथ १५ मिनेटका लागि स्थगित भएपछि पुन:सुरु भएको छ । 

बैठकमा एक जना पनि मन्त्रीको उपस्थिति नभएपछि नेपाली कांग्रेसका सांसद रामकृष्ण  यादवले सभामुख देवराज घिमिरेको ध्यानाकर्षण गराएपछि बैठक स्थगित भएको हो । आजको बैठकमा गृह मन्त्रालय, अर्थ मन्त्रालय र शिक्षा, विज्ञान तथा प्रविधि मन्त्रालयसम्बन्धी मौखिक प्रश्नहरूको सम्बन्धित मन्त्रीले उत्तर दिने कार्यसूची छ ।

कार्यसूचीअनुसार बैठकमा प्रधानमन्त्री पुष्पकमल दाहाल ‘प्रचण्ड’ले ‘लोक सेवा आयोगको चौसट्ठिऔँ वार्षिक प्रतिवेदन पेस गर्नुहुने छभने ऊर्जा, जलस्रोत तथा सिँचाई मन्त्री शक्तिबहादुर बस्नेतले ‘जलस्रोत विधेयक, २०८१ माथि विचार गरियोस्’ भनी प्रस्ताव प्रस्तुत गर्नुहुनेछ । त्यसैगरी, अर्थमन्त्री वर्षमान पुनले ‘बैङ्क तथा वित्तीय संस्थासम्बन्धी (पहिलो संशोधन) विधेयक, २०८० लाई समितिमा पठाइयोस्’ भनी प्रस्ताव प्रस्तुत गर्नुहुने छ ।

उद्योग, वाणिज्य तथा आपूर्तिमन्त्री दामोदर भण्डारीले ‘लगानी सहजीकरणसम्बन्धी केही नेपाल ऐनलाई संशोधन गर्ने विधेयक, २०८१ माथिको दफावार छलफल सदनमा गरियोस्’ भनी प्रस्ताव प्रस्तुत गर्नुहुने कार्यसूची छ ।