वेद र विज्ञानसम्बन्धी अन्तर्राष्ट्रिय सम्मेलन

काठमाडौँ । वेद र विज्ञानका ज्ञान अनुभवका आधारमा आधुनिक समाजलाई गति दिन यस क्षेत्रका ज्ञाता र प्रबुद्ध व्यक्तिले जोड दिनुभएको छ ।

क्याडेनियन वैदिक हेरिटेज, क्यानाडाद्वारा आज आयोजित वेद र विज्ञानसम्बन्धी अन्तर्राष्ट्रिय सम्मेलनमा स्वामी डा केशवानन्दले वेदमा भएका विज्ञानका गहन विषयवस्तुहरुलाई अहिलेका पुस्ताले मनन् गर्नुपर्ने बताउनुभयो । उहाँले वेद र विज्ञानले एकले अर्काेलाई वहिष्कार नगरी आपसमा सामञ्जस्यको खोजी गर्नुपर्ने आग्रह गर्नुभभयो ।

विश्लेषक अरुण सुवेदीले उपनिषद् पढ्दा आफूलाई केमेष्ट्री पढे जस्तो लागेको बताउँदै आजका आधुनिक विज्ञानका पुस्तकमा पढिएका कुरा सात हजार वर्ष अगाडि हाम्रै ग्रन्थहरुमा रहेछन् भन्ने थाहा पाउँदा गौरव लागेको उल्लेख गर्नुभयो ।

लेखक सौरभ सत्यालले समाज नै वेदको अवधारणमा सञ्चालित भएको बताउँदै यसलाई संस्थागत ज्ञान र अभिलेखमा राख्ने प्रणाली पुनःस्थापित गर्नुपर्नेमा जोड दिनुभयो ।

वरिष्ठ पत्रकार युवराज घिमिरे आफूले भारतमा पत्रकारिता गर्दा सति प्रथाबारे बुझ्न खोज्दा वेद र उपनिषद् पढेको र वेदमा अहिलेका विश्वविद्यालयमा पाइने ज्ञान नै भएको सुनाउनुभयो ।

अर्थवेदाचार्य नारायाण घिमिरेले गुरुकूल पद्धतिको संरचना भत्काएर आधुनिक विज्ञानको संरचनामा समाज गएको स्थितिमा अब आधुनिक विज्ञानका कमीकमजोरीलाई वेदका ज्ञानबाट पूर्ति गरी अघि बढ्नुपर्नेमा जोड दिनुभयो ।

सम्मेलनमा नेपाल, संयुक्त राज्य अमेरिका, संयुक्त अधिराज्य बेलायत, क्यानडा, जर्मनी र भारतबाट सहभागिता रहेको थियो ।