अर्को सरकार गठनका लागि तत्काल उपयुक्त विकल्प देखिँदैन : अध्यक्ष ओली
विराटनगर I नेकपा एमालेका अध्यक्ष केपी शर्मा ओलीले वर्तमान गठबन्धन सरकारलाई हटाएर अर्को सरकार बनाउने उपयुक्त विकल्प समेत आफूले नदेखेको बताउनुभएको छ ।
तर उहाँले मुलुकको अहिलेको अवस्थाप्रति नेपाली काँग्रेस गम्भीर नभएको आरोप लगाउनुभयो ।
विराटनगर विमानस्थलमा आज सञ्चारकर्मीसँग कुरागर्दै पूर्व प्रधानमन्त्री समेत रहनु भएका अध्यक्ष ओलीले देश र जनताप्रति सोच्ने फुर्सद समेत काँग्रेसलाई नभएको बताउनुभयो । अध्यक्ष ओलीले काँग्रेसलाई जिम्मेवार बन्न आग्रह गर्नुभयो ।
गठबन्धन सरकारले राम्रो कामगर्न नसकेको आरोप लगाउँदै अध्यक्ष ओलीले यो सरकारले नेपाली जनता र राष्ट्रलाई केही दिन नसकेको बताउनुभयो ।
अध्यक्ष ओलीले कोशी प्रदेश सरकार गठनका विषयमा मुलुकमा राजनीतिक स्थायित्वका लागि मध्यावधिमा जानु उपयुक्त नहुने बताउनुभयो ।
उहाँले कोशी प्रदेशलाई मध्यावधितर्फ धकेल्नु बुद्धिमत्ता होइन भन्नुहुँदै यदाकदा कोशी प्रदेश मध्यावधिमा गइहाले पनि आफ्नो पार्टीले बहुमत ल्याउने दाबी गर्नुभयो । एक प्रश्नमा उहाँले अहिले भइरहेको नेकपा एमालेको प्रदेश अधिवेशनमा आफूले कुनै हस्तक्षेप नगरेको बताउनुभयो । सहमति नभए निर्वाचनको माध्यमबाट प्रदेश अधिवेशनमा नेतृत्व चयन भइरहेकाले आफू माथि गलत प्रचार भइरहेको उहाँको भनाई थियो ।
प्रतिक्रिया राख्नुहोस्