‘रामायण सर्किटको विकासमा तीव्रता जरुरी’
जनकपुरधाम । प्रदेश नंं २ का प्रदेश प्रमुख हरिशंकर मिश्रले नेपाल भारत बिचको सम्बन्धलाई अझ मजबुत बनाउनका लागि विकाससँग जोड्न आग्रह गर्नुभएको छ ।
जनकपुरधाम उपमहानगरपालिकाको आयोजना तथा मिथिला अनुसन्धान सांस्कृतिक संरक्षण परिषद् जनकपुरधामको संयोजनमा भएको रामायण सर्किट तथा मिथिला अवध सम्बन्धका बारेमा आयोजना गरिएको कार्यक्रममा प्रदेश प्रमुख मिश्रले जनकपुरधाम र अयोध्या बिचको प्रगाढ सम्बन्धलाई थप मजबुत बनाउन सडक, रेल तथा हवाई मार्गबाट जोडेर पर्यटन प्रवर्द्धनमा विशेष ध्यान दिन आवश्यक भएको बताउनुभयो ।
प्रदेश प्रमुख मिश्रले दुवै देशका सरकारले रामायण सर्किटको विकासका लागि थप सहकार्य गरेर कामकाज गर्न आवश्यक भएको बताउनुभयो ।
नेपालका लागि श्रीलङ्काका राजदूत हिमाली सुवासनी अरुणालिकाले नेपाल, भारत र श्रीलङ्कालाई जोडेर रामायण सर्किटको विकास गर्ने धेरै आधारहरू श्रीलङ्कामा रहेको बताउँदै ती ठाउँहरूको संरक्षण गर्ने काम श्रीलङ्का सरकारले गरेको बताउनुभयो ।
अयोध्यामा राम मन्दिर निर्माणमा सक्रिय रहनुभएका राजेन्द्र सिंह पङ्कजले नेपाल भारत बिचको सम्बन्धलाई थप प्रगाढ बनाउनमा रामायण सर्किटले योगदान गर्ने बताउनुभयो ।
विश्व हिन्दु परिषद् भारतका केन्द्रीय उपाध्यक्ष जिवेश्वर मिश्रले धर्म संस्कृतिको रक्षा विना कुनै पनि देशको विकास सम्भव नहुने बताउँदै रामायण सर्किटको विकासका लागि भारत सरकारले काम गरिरहेको बताउनुभयो ।
प्रतिक्रिया राख्नुहोस्