२०७८ साल माघ ५ गते बुधबार

तपाईँ सुन्दै हुनुहुन्छः

साग खेलकूद सफल पार्न सरकार कटिबद्ध छ : मन्त्री विश्वकर्मा

रेडियो नेपाल २०७६ कार्तिक ३० गते ११:३४

पोखरा। युवा तथा खेलकूदमन्त्री जगतबहादुर विश्वकर्माले मुलुकको प्रतिष्ठानसँग जोडिएको १३औँ साग खेलकूद प्रतियोगिता भव्य र सभ्यरूपमा सफल पार्न सरकार कटिबद्ध रहेको बताउनुभएको छ ।

आगामी मङ्सिर १५ गतेदेखि सञ्चालन हुने प्रतियोगिताको तयारीबारे प्रचार–प्रसार तथा प्रकाशन समितिद्वारा आज पोखरामा आयोजित पत्रकार भेटघाटमा उहाँले प्रतियोगिताका लागि आवश्यक भौतिक पूर्वाधार निर्माण भइसकेको जानकारी दिनुभयो ।

चुनौतीका रूपमा रहेको भौतिक पूर्वाधार निर्माणसँगै सफलता प्राप्तिका लागि राष्ट्रिय टिम तयारीको काम अगाडि बढाइएको बताउँदै उहाँले खेलाडीलाई स्वदेश र विदेशमा समेत बन्द प्रशिक्षणमा सहभागिता गराइएको बताउनुभयो ।

दशरथ रङ्गशाला, सातदोबाटोस्थित पौडीपोखरी, पोखरा रङ्गशालामा आवश्यक भौतिक पूर्वाधार निर्माणमा बजेटको कुनै पनि कमी हुन नदिएको बताउँदै मन्त्री विश्वकर्माले प्रतियोगितामा नेपाली खेलाडीले उच्च मनोवलका साथ खेल प्रदर्शन गर्ने वातावरण तयार गरिएका कारण सफलता प्राप्त गर्ने विश्वास व्यक्त गर्नुभयो ।

पहिलोपटक १९८४ मा साग खेलकूद प्रतियोगिताको आयोजना गरेर खेल क्षेत्रले गौरव गर्ने इतिहास रचेको नेपालले आठाँै र अहिले १३आँै संकरण पुनः आयोजना गर्ने अवसर प्राप्त गरेको स्मरण गर्दै प्रतियोगितालाई सफल पार्न सम्पूर्ण देशवासीको सामूहिक दायित्व भएको बताउनुभयोे ।

प्रचार–प्रसार उपसमिति सहसंयोजक रञ्जन अधिकारीको अध्यक्षतामा भएको कार्यक्रममा पत्रकार दीननाथ बरालले खेलकूदको माध्यमबाट पोखराको पर्यटन विकासमा सहयोग पुग्ने धारणा प्रकट गर्नुभयो । यसअघि पोखरा रङ्गशालामा निर्माण भइरहेका भौतिक पूर्वाधारको स्थलगत निरीक्षण गर्नुभएको मन्त्री विश्वकर्माले फुटबल मैदानमा दुबो रोप्ने र प्यारापिट निर्माणमा तीव्रता दिन निर्माण कम्पनीलाई निर्देशन दिनुभएको थियो ।

सार्कअन्तर्गत पोखरा रङ्गशालामा महिला क्रिकेट, प्याराग्लाइडिङ, व्याडमिन्टन, महिला फुटबल, भारोत्तोलन, विट भलिबल, ह्याण्डबल, ट्रयाथोलन र आरचरीलगायतका नौवटा खेल सञ्चालन गरिने भएको छ ।

सम्बन्धित