पर्यटकीय राजधानी पोखराको तालबाराही आरतीमा ४० हजारले गरे अवलोकन

चिप्लेढुङ्गा। पर्यटकीय राजधानी पोखराको फेवाताल किनारमा माता तालबाराही सेवा समितिले गर्दै आएको सन्ध्या आरती कार्यक्रममा एक वर्षमा ४० हजार पर्यटकले अवलोकन गरेका छन् । आन्तरिक तथा बाह्य पर्यटकलाई लक्षित गरी धार्मिक तथा सांस्कृतिक प्रवद्र्धन गर्ने उद्देश्यले शुरु गरिएको सङ्गीतमय महाआरती पुजन गत वर्ष असोज २४ गते घटस्थापनाका दिनबाट शुरु गरिएको हो ।

सन्ध्या आरतीले आन्तरिक तथा बाह्य पर्यटकलाई आकर्षित गर्दै गएकोसमितिका अध्यक्ष गिरिराज अधिकारीले बताउनुभयो । सन्ध्याकालीन आरतीमा एक वर्षमा ४० हजारले अवलोकन गरेको उहाँले जानकारी दिनुभयो । २६ हजार नेपाली र अन्य भारत तथा तेस्रो मुलुकका पर्यटक छन् । “शुरुमा आर्थिक कठिनाइले निरन्तरता दिन गाह्रो हुन्छ कि भन्ने लागेको थियो, तर पर्यटक भक्तजनको उत्साहजनक सहभागिता र दानदक्षिणाले यसलाई निरन्तरता दिन सफल भयौँ”, अधिकारीले भन्नुभयो, “दैनिक पाँच हजार.खर्च हुन्छ, अहिलेसम्म एक वर्षमा रु १८ लाख खर्च भएको छ ।”

भक्तजनबाट रु १६ लाख ५० हजार आम्दानी भएको अधिकारीले जानकारी दिनुभयो । उहाँले पर्यटन व्यवसायी गणेश भट्टराई, स्थानीय ढाकाबहादुर थापा र दामोदर गिरीले रु २५ हजार सहयोग गरी अक्षयकोषमा रु एक लाख ५० हजार रहेको पनि जानकारी गराउनुभयो । सन्ध्या आरतीमा पानी पर्दा निकै समस्या हुने भएकाले छत हालेर व्यवस्थित बनाउन आवश्यक रहेको भन्दै पूर्वाधार विकासका लागि सहयोग नपाएको उहाँको गुनासो छ ।

प्रसिद्ध महाआरती सञ्चालन गर्दा धार्मिक पर्यटक वृद्धि हुनुका साथै पोखरामा पर्यटकको बसाइँ लम्ब्याउने र बेलुकाको समयमा फेवाताल किनारमा महाआरती सञ्चालन गर्दा मानिसमा सकरात्मक सन्देश प्रवाह भई विकृति विसङ्गतीको अन्त्य हुने उहाँको विश्वास छ । गण्डकी प्रदेशसभा सदस्य राजीव पहारीले पोखराको फेवाताल दृश्यावलोकन र डुङ्गा सयरका लागि मात्र नभई आध्यात्मिक शान्तमनका लागि उत्कृष्ट गन्तव्य रहेको बताउनुभयो ।

फेवातालको बीचमा रहेको तालवाराही मन्दिरमा सन्ध्याकालीन आरती पूजा शुरु गरिएपछि आध्यात्मिक पर्यटक र श्रद्धालु भक्तजनलाई आकर्षित गरेको उहाँको भनाइ थियो । तालबाराहीको आरतीले पर्यटकलाई निकै आकर्षित गरिरहेको होटल रानीवन आर्केटका सञ्चालक शारदा भुजेलले बताउनुभयो । होटलमा आउने पाहुनाले आरती हेरेर आएपछि निकै सकारात्मक प्रतिक्रिया दिने गरेका उहाँको भनाइ छ ।

पूजा आरधनाले आध्यात्मिक शक्ति जगाउने र मनलाई शान्त बनाउने भुजेल बताउनुहुन्छ । दिउँसो मात्र पर्यटकको चहलपहल हुने फेवातालमा सन्ध्याकालीन आरती पूजाले साँझ पनि पर्यटकको भीड लाग्ने गरेको होटल सङ्घका कोषाध्यक्ष पार्वती पाण्डेले बताउनुभयो । नेपालमा बढ्दो आन्तरिक पर्यटकको आगमनले पर्यटन उद्योगको विकासमा भूमिका खेल्दै गएको उहाँको भनाइ छ ।

आरती सेवा समितिका सचिव सूर्यनाथ पहारीले आरती गराउन देश तथा विदेशबाट समेत भक्तजन आउने गरेका बताउनुभयो । परिवारका सदस्यको जन्मदिनमा वा मृतात्माको चीर शान्तिको कामना गर्न आरती गर्नेको सङ्ख्या बढिरहेकोे छ । पोखरा आउने आन्तरिक तथा बाह्य पर्यटक साँझमा फेवा किनारको आरतीमा भक्तिसङ्गीतमा झुम्दै नाच्ने गरेका उहाँले बताउनुभयो । रासस