रोपाइँ महोत्सव : हिलोमा खेल्दै विदेशी पर्यटक
पोखरा । विदेशी पर्यटकहरू १९ औँ संस्करणको असारे रोपाइँ महोत्सव २०८१ मा हिलो खेल्दै रमाउनुभएको छ ।
![](https://onlineradionepal.gov.np/wp-content/uploads/2024/06/c3d93f30-ec46-451c-aebe-b051994f2215-1024x576.jpg)
पोखरा २३ को फेवा फाँटमा पोखरा पर्यटन परिषदद्वारा आयोजित महोत्सवमा विदेशी पर्यटकहरू हिलोमा खेलिने विभिन्न खेलकुदमा सहभागी हुनुभएको परिषद्का अध्यक्ष पोमनारायण श्रेष्ठले बताउनुभयो ।
![](https://onlineradionepal.gov.np/wp-content/uploads/2024/06/1f35de1b-7a76-4dcf-8351-2e657f724f8b-1024x576.jpg)
“पोखरा सबै मौसमका लागि भन्ने मूल नाराका साथ “रोपाइँ महोत्सव“ विगतका वर्षदेखि पोखरा क्षेत्रका विभिन्न स्थानहरूमा महोत्सव आयोजना गरिँदै आएको श्रेष्ठले जानकारी दिनुभयो । खेतीयोग्य जमिनलाई संरक्षण गरी बाँझो जग्गामा खेतीका प्रोत्साहन गर्न महोत्सवले सहयोग गर्ने उहाँले बताउनुभयो ।
![](https://onlineradionepal.gov.np/wp-content/uploads/2024/06/pho-01-1024x576.jpg)
महोत्सवको उद्घाटन गर्दै गण्डकी प्रदेशका मुख्यमन्त्री सुरेन्द्रराज पाण्डेले फेवाताल संरक्षणमा सबैले ध्यान दिनुपर्नेमा जोड दिनुभयो । फेवातालको सिरान भागमा भएको उक्त महोत्सवमा मुख्यमन्त्री पाण्डेले प्रदेशका साथै नेपालको उत्पादन र उत्पादकत्व वृद्धि गर्नुपर्ने बताउनुभयो ।
![](https://onlineradionepal.gov.np/wp-content/uploads/2024/06/342072ca-9b2a-4fd9-856b-5b89b5f2ed33-1024x576.jpg)
प्रदेशमा सामाजिक विकास तथा स्वास्थ्य मन्त्री बिन्दुकुमार थापाले फेवाताल संरक्षणमा आफूहरू कटिबद्ध भएको बताउनुभयो ।
![](https://onlineradionepal.gov.np/wp-content/uploads/2024/06/4cec793c-33b9-4602-98c2-fb6b3d712e91-1024x576.jpg)
प्रदेश सांसद प्रकाश बरालले पोखराको फेवातालसहित भ्यु फेवा राउण्ड फेवा परियोजनाले पोखराको पर्यटन प्रवर्द्धनमा टेवा पुग्ने विश्वास व्यक्त गर्नुभयो ।
महोत्सवमा स्वदेशी तथा विदेशी पर्यटकको उल्लेखनीय सहभागिता रहेको परिषद्का महासचिव सञ्जयकान्त सिग्देलले बताउनुभयो ।
हिलोमा भलिबल, हिले दौड, र रस्साकस्सी लगायतका प्रतियोगिता सञ्चालन गरिएको महोत्सवका संयोजक तारानाथ पहरीले बताउनुभयो ।
![](https://onlineradionepal.gov.np/wp-content/uploads/2024/06/pho-dance-1024x576.jpg)
महोत्सवमा साँस्कृतिक तथा मनोरञ्जनात्मक कार्यक्रम पनि प्रस्तुत: गरिएका थिए । कलाकार समीक्षा अधिकारी, प्रजापति पराजुली, निर्जला गुरुङ, बालकाशी गुरुङ लगायतले प्रस्तुती दिनुभएको महासचिव सिग्देलले बताउनुभयो ।
![](https://onlineradionepal.gov.np/wp-content/uploads/2024/06/756d43a4-136e-4bdb-9957-3f390f2800a2-1024x576.jpg)
प्रतिक्रिया राख्नुहोस्