प्रतिनिधि सभा बैठक: समसामयिक विषयमा सरकारको ध्यानाकर्षण

काठमाडौँ । प्रतिनिधि सभाको आजको बैठकमा सांसद्हरुले समसामयिक विषयमा सरकारको ध्यानाकर्षण गराउनुभएको छ ।विशेष समयमा बोल्नुहुँदै सांसद् एनपी साउँदले मुलुकको परराष्ट्र सम्बन्ध र कूटनीतिमा गम्भीर असर पुग्न सक्ने भन्दै राजदूत नियुक्तिलाई गम्भीरताका साथ लिन सरकारको ध्यानाकर्षण गराउनुभयो ।

सांसद गोकुल बास्कोटाले दूध बेचेर जीविकोपार्जन गर्ने किसानहरूको ५ अर्ब भन्दा बढी रुपैयाँ भुक्तानी बाँकी रहेको भन्दै किसानले पाउनुपर्ने रकम तत्काल उपलब्ध गराउन माग गर्नुभयो ।

सांसद् देवेन्द्र पौडेलले आज प्रकाशित एसइईको परीक्षाफल अपेक्षित नभएको भन्दै शिक्षाको गुणस्तर सुधारमा ध्यान दिई शिक्षालाई उत्पादन र बजारसँग जोड्न सरकारको ध्यानाकर्षण गराउनुभयो ।

यस अघि बैठकको आकस्मिक समयमा सांसद्हरुले मनसुन शुरु हुनु पूर्व भएका विपद्का घटनाबाट पीडितहरूलाई राहत, उद्धार तथा क्षतिपूर्ति उपलब्ध गराउन सरकारको ध्यानाकर्षण गराउनुभयो ।  ।

सांसदहरुले मनसुन सुरु नहुँदै मुलुकका विभिन्न भूभागमा गएको बाढी पहिरो र चट्याङका कारण धन जनको क्षति भएको भन्दै पीडितलाई उचित राहत,उद्धार र क्षतिपूर्ति उपलब्ध गराउन सरकारको ध्यानाकर्षण गराउनुभयो ।

सांसद्हरुले वर्षायाममा हुन सक्ने सम्भावित क्षति न्यूनीकरणका लागि ठोस कार्य योजनासहित जोखिमयुक्त ठाउँमा जनशक्ति परिचालन गर्न माग गर्नु भयो ।

आजको  बैठकमा राष्ट्रिय सभामा उत्पत्ति भएको “अन्तर्राष्ट्रिय सम्बन्ध र पर्यटन समितिको प्रतिवेदन सहितको अभिलेख संरक्षण (पहिलो संशोधन) विधेयक, २०७८ माथी छलफल हुने कार्य सूची रहेको छ ।

यस्तै बैठकमा संस्कृति पर्यटन तथा नागरिक उड्डयन मन्त्री हितबहादुर तामाङले अभिलेख संरक्षण (पहिलो संशोधन) विधेयक, २०८१ लाई पारित गरियोस्” भनी सभा समक्ष प्रस्ताव प्रस्तुत गर्नुहुने कार्यसूची समेत रहेको छ ।