रफाहमा हमासविरूद्धको कारबाहीलाई अघि बढाइरहेको इजरायलको दाबी

जेरुसेलम। इजरायलले १५ लाख प्यालेस्टिनीको आश्रयका गाजाको दक्षिणी शहर रफाहमा सैन्य कारबाही सुरू भएमा यसले निर्दोष थप सर्वसाधारणको हताहत बढ्ने भन्दै अन्तर्राष्ट्रिय आक्रोशका बावजुद आफ्नो योजनाबद्ध अभियानलाई ‘अगाडि बढाइरहेको’ बताएको छ ।

सरकारका प्रवक्ता डेभिड मेन्सरले पत्रकार सम्मेलनमा भन्नुभयो, “इजरायलले रफाहमा हमासलाई निशाना बनाउने हाम्रो अभियान अघि बढाइरहेको छ ।”

उहाँले भन्नुभयो,“रफाहमा रहेका चार सैन्य बटालियन इज्रायलबाट जोगिने छैनन् । तिनीहरूमाथि आक्रमण हुनेछ ।”

प्यालेस्टिनी इस्लामिक आन्दोलनविरुद्ध गाजामा रक्षात्मक र सामरिक मिसनका लागि ‘दुई थप ब्रिगेड’ परिचालन गरिएको मेन्सरले बताउनुभयो ।

गत अक्टोबर २७ मा गाजामा इजरायलले स्थलआक्रमण सुरु गरेयता हमासका २४ बटालियनमध्ये कम्तीमा १८ वा १९ बटालियन ध्वस्त भइसकेको उहाँले बताउनुभयो ।

इजरायली प्रधानमन्त्री बेन्जामिन नेतन्याहुले गाजाको अन्तिम प्रमुख जनसङ्ख्या केन्द्र रफाहमा इजरायली स्थल सेना प्रवेश गर्न बाँकी रहेको रयसलाई इजरायलले छिट्टै अघि बढाउने बारम्बार बताउँदै आउनुभएको छ ।

गाजामा इस्लामिक समूहलाई नष्ट गर्ने आफ्नो सरकारको युद्ध उद्देश्यका लागि रफाहमा हमासका बाँकी रहेका चार बटालियनको अन्त्य हुनु महत्वपूर्ण रहेको उहाँले बताउनुभयो ।

गाजाका २४ लाख जनसङ्ख्यामध्ये अधिकांशले रफाहमा शरण लिएका छन् र धेरैले अस्थायी शिविरमा आश्रय लिएका छन् ।

इजरायलको प्रमुख सहयोगी संयुक्त राज्य अमेरिकासहितका देशहरूले ठूलो सङ्ख्यामा नागरिक हताहत हुने डरले रफाहमा सेना नपठाउन इजरायलसँग आग्रह गर्दै आएका छन् ।

अमेरिकी विदेश मन्त्रालयका प्रवक्ता म्याथ्यु मिलरले यसै महिनाको सुरुमा भन्नुभएको थियो, “रफाहमा पूर्ण सैन्य आक्रमणले त्यहाँ फसेका सर्वसाधारणमा निकै हानिकारक प्रभाव पार्नेछ र यसले अन्ततः इजरायलको सुरक्षामा असर पार्नेछ ।”

रेडक्रसका अधिकारी फाब्रिजियो कार्बोनीले आक्रमण हुनुअघि रफाहका बासिन्दालाई शहरबाट अन्यत्र सार्ने योजनाबारे मानवीय समूहलाई कुनै जानकारी नभएको बताउनुभयो ।

उहाँले एएफपीसँगको कुराकानीमा भन्नुभयो, “विनाशकारी मानवीय क्षति बिना सैन्य अभियान सञ्चालन गर्न सक्ने अवस्था छैन ।”

हमास गाजामा स्थायी युद्धविराम चाहन्छ, जुन यस चरणमा नेतन्याहूलाई अस्वीकार्य छ । यसले हमासका सबै बटालियनहरूलाई ‘समाप्त’ गर्ने प्रतिज्ञा गरेका छन् ।

मेन्सरले गाजामा अहिलेसम्म भएको युद्धमा कम्तीमा २६ हजार आतङ्ककारी मारिएको, पक्राउ परेको वा घाइते भएको बताएका छन् ।

एएफपीले प्राप्त गरेको इजरायली आधिकारिक तथ्याङ्कअनुसार अक्टोबर ७ मा हमासका लडाकुहरूले इजरायलमा आक्रमण गरेपछि युद्ध सुरु भएको थियो । आक्रमणका कारण कारण एक हजार १७० जनाको मृत्यु भएको थियो । मारिनेमा अधिकांश सर्वसाधारण थिए ।

हमासविरुद्ध इजरायलले गरेको जवाफी कारबाहीमा गाजामा ३४ हजार २६२ जनाको मृत्यु भएको छ, जसमध्ये अधिकांश महिला र बालबालिका रहेको हमासद्वारा सञ्चालित क्षेत्रको स्वास्थ्य मन्त्रालयले जनाएको छ ।एएफपी