पोखरामा ६ दिन देखि फोहोर उठ्न सकेन
![](https://onlineradionepal.gov.np/wp-content/uploads/2022/03/pokhara-ko-phora-3-1024x768.jpg)
कास्की । पोखरा उपत्यकामा ६ दिन देखि फोहोर उठ्न सकेको छैन । पोखरा शहर यति बेला दुर्गन्धित भएको छ । फोहोरमैला व्यवस्थापन हुने ल्यान्डफिल साइटका बासिन्दा आन्दोलित हुँदा महानगरभित्रको फोहोर उठ्न सकेको छैन । आन्दोलनरत पोखरा १४ का स्थानीयले महानगरसँग ७ बुँदे माग राख्दै सडक अवरुद्ध गरेपछि फोहोरमैला व्यवस्थापन अस्तव्यस्त बनेको हो ।
स्थानीयले फोहोरमैला लैजाने बाटो रोकेपछि ६ दिनदेखि फोहोर सडक किनारमै थुप्रिएको छ । सडक पेटीमा हिँड्ने पैदल यात्री नाक मुख छोपी हिँड्न बाध्य भएका छन् । कुहिएको फोहोरबाट निस्केको गन्धले रोग फैलन सक्ने सम्भावना पनि उत्तिकै रहेको विज्ञहरू बताउँछन् ।
फोहोर व्यवस्थापनमा अन्योल हुँदा पोखराका मुख्य चोक महेन्द्रपुल, चिप्लेढुंगा, भैरव टोल, बगर, न्युरोड, नयाँ बजार, हस्पिटल, अमरसिंह चोक, लेकसाइड आदिमा दुर्गन्ध फैलाएको छ । महानगरपालिकाले आफूहरूसँग वार्ता नगरको सङ्घर्ष समिति अध्यक्ष बोधराज कार्कीको आरोप रहेको छ ।
![](https://onlineradionepal.gov.np/wp-content/uploads/2022/03/pokhara-ko-phora-4-1024x576.jpg)
‘शुक्रवार वार्ता भएको थियो तर उहाँहरूले अधिकार ल्याउनुभएको रहेनछ । अधिकार लिएर वार्तामा आउनुपर्यो । शनिबार कास्कीका सिडिओसँग कुरा भएको थियो । वार्ताको टेबलमा बस्न हामी तयार छौँ,’ उहाँले भन्नुभयो ।
पोखरा १४ मा स्वास्थ्य ल्याबसहितको सहरी स्वास्थ्य चौकी बनाउन ‘दाह संस्कारका लागि आवश्यक घाट निर्माण, सडक र पोखरा १४ र पोखरा २१ निर्मलपोखरी जोड्ने पुलको माग स्थानीयले राखेका छन् ।
पोखरा महानगरपालिकाका प्रवक्ता धनबहादुर नेपालीले आन्दोलनरत पक्षले अत्तो थाप्ने काम गरेको बताउनु भएको छ । उहाँले भन्नुभयो , ‘महानगर वार्ताका लागि बस छ । तर उहाँहरू वार्ता गर्न तयार देखिनु हुन्न । बाटोमा बसेर वार्ता हुँदैन । त्यसमाथि महानगर प्रमुख बिरामी हुनुहुन्छ ।’
६ दिन फोहोर नउठ्दा महानगरपालिकामा ६ सय टन फोहोर थुप्रिएको सरसफाइ महाशाखा प्रमुख कल्पना बराल बताउनु हुन्छ ।
प्रतिक्रिया राख्नुहोस्