घुस लिँदै गर्दा सिम्रौनगढका निमित्त प्रमुख प्रशासकीय अधिकृत साह पक्राउ 

बारा। अख्तियार अनुसन्धानको कार्यालय हेटौडाको टोलीले सिम्रौनगढ नगरपालिकाका  निमित्त प्रमुख प्रशासकीय अधिकृत वीरेन्द्र साहलाई ७८ हजार घुस सहित पक्राउ गर्नुभएको छ । 

 अख्तियारको कार्यालय हेटौडाबाट आएको टोलीले कलैया उपमहानगरपालिका वडा नम्बर-४ स्थित रहेको कार्यालय प्रमुख बस्ने निवासबाट  घुसको सो रकम लेनदेन गरिरहेको अवस्थामा नै रंगेहात  पक्राउ गरिएको अख्तियारको कार्यालय  हेटौडाका सूचना अधिकारी गोविन्द गौतमले जानकारी दिनुभयो । 

पालिकाको खाजा खाएको एक होटेलको भुक्तानी गरिदिनका लागि रु ८०  हजार घुस मागेको पीडितको निवेदन अनुसार नै साहलाई पक्राउ गरिएको  अख्तियारका प्रवक्ता गौतमले भन्नुभयो । जननिर्वाचित प्रतिनिधि , सञ्चारकर्मी सहितको रहाेबरमा  मुचुल्का  पुरा गर्ने काम भई पक्राउ परेका निमित्त प्रशासकीय अधिकृत साहलाई हेटौडा ल्याउने काम भइरहेको प्रवक्ता गौतमले जानकारी दिनुभयो । 

दिउसो १ बजेको समयमा पैसा लिएर निमित्त प्रमुख प्रशासकीय अधिकृतलाई दिन गएको बेलामा पक्राउ गरिएको थियो प्रवक्ता गौतमले बताउनुभयो ।  पक्राउ पेका निमित्त प्रमुख प्रशासकीय अधिकृतका बारेमा थप अनुसन्धान भइरहेको अख्तियारका प्रमुख उमाकान्त आचार्यले जानकारी दिनुभयो ।