घरबार विहीन भएका ६४ परिवारलाई राहत सामग्री वितरण 

सर्लाही । सर्लाहीमा बागमती सेवा समाज नेपालले असोज १६ गते अविरल वर्षाका कारण बिचल्लीमा परेका ६४ परिवारलाई राहत सामग्री वितरण गरेको छ।

गत शुक्रबार र शनिवारको लगातारको वर्षाका कारण प्रभावित भएका परिवारहरूलाई समाजले सहयोग प्रदान गरेको हो। यी परिवारहरू आर्थिक रूपमा अति विपन्न हुन् र उनीहरूको घर डुबानमा परेको थियो। बाढी र वर्षाको कारण घरबार विहीन भएका ती परिवारहरूलाई सहयोग स्वरूप राहत सामग्री उपलब्ध गराइएको हो।

नेपाल सरकारबाट अझै कुनै किसिमको राहत प्राप्त नभएको अवस्थामा बागमती सेवा समाजले ओक्सफाम नेपालको सहयोगमा राहत वितरण गरेको हो। हरिवन, हरिपुर, ईश्वरपुर, र कविलासी नगरपालिकाका विभिन्न वडामा रहेका ६४ परिवारलाई खाद्यान्न लगायत अन्य आवश्यक सामग्री प्रदान गरिएको छ। समाजका परियोजना अधिकृत किशोर उपाध्यायका अनुसार प्रभावित परिवारहरूलाई प्रदान गरिएका सामग्रीहरूमा त्रिपाल, २५ केजी चामल, दाल, चिनी, नुन, तयारी (इमर्जेन्सी) खाना जस्तै चिउरा, भुजा, दालमोठ, चाउचाउ, बिस्कुट लगायतका खानेकुरा थिए। त्यसका साथै, उच्च स्वास्थ्य र सरसफाइका लागि हाईजेनिक किट समेत प्रदान गरिएको छ। हाईजेनिक किटमा बाल्टिन, मग, साबुन, टुथपेस्ट, मन्जन, ब्रस, तौलिया लगायतका सरसफाइका सामग्रीहरू रहेका थिए।

प्रभावित परिवारहरूलाई चार हजारदेखि १२ हजार रुपैयाँको राहत सामग्री वितरण गरिएको समाजले जनाएको छ। राहत सामग्री प्राप्त गरेपछि ती परिवारहरूको मुहारमा खुसी देखिन्थ्यो। वर्षाले घरबार विहीन बनेका ती परिवारहरूलाई आधारभूत आवश्यकताका सामग्री पाएपछि केही राहत महसुस भएको थियो।

राहत वितरण कार्य समाजका पूर्वअध्यक्ष भरतकुमार कार्की, परियोजना संयोजक उपाध्याय, र अन्य कर्मचारीहरूको सहभागितामा सम्पन्न भएको हो। समाजले सम्बन्धित वडा अध्यक्षहरूसँगको सहकार्यमा राहत सामग्री प्रदान गरेको हो। बागमती सेवा समाजले सर्लाही जिल्लामा मात्र होइन, अन्य विभिन्न जिल्लाहरूमा पनि विपद्‌को समयमा राहत वितरण गर्दै आएको छ। समाजले बाढी, पहिरो, र अन्य प्राकृतिक प्रकोपबाट प्रभावितहरूलाई समयमा नै आवश्यक सहयोग पुर्‍याउँदै आएको छ।

सामाजिक कार्यमा लामो समयदेखि सक्रिय रहेको बागमती सेवा समाजले शिक्षा, स्वास्थ्य, सरसफाई, र विपन्न वर्गको आयआर्जन तथा जीविकोपार्जनका क्षेत्रमा पनि महत्वपूर्ण योगदान पुर्‍याउँदै आएको छ। विपद्‌को समयमा मात्र होइन, अन्य विभिन्न सामाजिक क्रियाकलापहरूमा पनि समाजले अग्रसरता देखाउँदै स्थानीय समुदायका समस्या समाधानमा महत्वपूर्ण भूमिका निर्वाह गरेको छ।