प्रमुख प्रतिपक्षीले उठाएका विषयवस्तुप्रति सरकारले बेवास्ता गरिरहेको छ : प्रमुख सचेतक लेखक
काठमाडौँ । नेपाली कांग्रेस संसदीय दलका प्रमुख सचेतक रमेश लेखकले संसद्मा प्रमुख प्रतिपक्षले उठाएका महत्वपूर्ण विषयवस्तुप्रति सरकारले बेवास्ता गरिरहेको बताउनुभएको छ ।
पार्टी संसदीय दलको कार्यालय सिंहदरबारमा पत्रकारसँगको भेटघाटमा उहाँले मन्त्री वा कुनै व्यक्ति विशेष नभई हजारौँ जनताको अर्बौँ रकम हिनामिना र अपचलन भएको विषयमा छानबिन गरौँ भन्दा त्यसलाई बेवास्ता गरिएको आरोप लगाउनुभयो ।
प्रमुख सचेतक लेखकले जनताले छाक काटेर सहकारीमा राखेको रकम अपचलन गर्नेलाई कानुनी कारबाहीको दायरामा ल्याइनुपर्ने बताउनुभयो ।
देश र जनताका महत्वपूर्ण र आधारभूत विषयमा सरकार, प्रमुख प्रतिपक्ष दलबीच सहमति, सहकार्य र समन्वय हुन जरुरी रहेको बताउँदै उहाँले यसपटक पहिलाको जस्तो छायाँ सरकार बनाएर अघि बढ्ने मनस्थितिमा कांग्रेस नरहेको जानकारी दिनुभयो ।
यसैबिच नेपाली कांग्रेस संसदीय दलको बैठक भोली दिउँसो २ः०० बजे संघीय संसद् भवन नयाँ वानेश्वरमा बस्ने नेपाली काँग्रेसले जनाएको छ ।
प्रतिक्रिया राख्नुहोस्