गाउँपालिकाको अनुदानमा सयपत्री फूलखेती

स्याङ्जा । स्याङ्जाको कालीगण्डकी गाउँपालिकाले फूल खेतीमा ५० प्रतिशत अनुदान दिएपछि कृषक सयपत्री फूल खेतीतर्फ आकर्षित भएका छन् ।

फूल खेतीका माध्यमबाट स्थानीयवासीलाई रोजगारी दिने र आर्थिक लाभ लिने उद्देश्यसहित गाउँपालिकाले गत वर्ष आफैँले फूल खेती थालेकामा यस वर्ष किसानलाई ५० प्रतिशत अनुदान दिएर फूल खेतीतर्फ आकर्षित गरेको हो ।

यस वर्ष गाउँपालिकाले करिब १५ रोपनी क्षेत्रफलमा र अन्य कृषक समूह तथा व्यक्तिको ३५ रोपनीमा सयपत्री फूल खेती गरिने गाउँपालिकाका अध्यक्ष खीमबहादुर थापाले बताउनुभयो ।

वडा नं ४ को बिर्घा पुछारमा करिब १५ रोपनीमा व्यावसायिक फूल खेती गर्नका लागि नर्सरी स्थापना गरिएको उहाँले बताउनुभयो । गाउँपालिकाले व्यावसायिक रुपमा फूल खेती गर्नका लागि नर्सरी राखेको बिर्घा पुछारमा पालिकाका सबै वडाबाट छनौट भई आएका कृषक समूह तथा कृषकलाई प्राविधिक ज्ञान दिइएको प्रमुख प्रशासकीय अधिकृत टङ्कराज पाण्डेयले बताउनुभयो ।

गत वर्ष गाउँपालिकाले परीक्षणका रुपमा थालेको फूल खेतीको उत्पादन तथा बजारीकरण राम्रो भई मनग्य आम्दानी गरेपछि यस वर्षदेखि कृषकलाई आकर्षित गर्न अनुदान उपलब्ध गराइएको गाउँपालिकाका कृषि अधिकृत अनुप पौडेलले बताउनुभयो । पालिकाका सातवटै वडाका तीन महिला समूह, एक घरबास (होमस्टे) र कृषक समूह छनौट भएका हुन् । कृषक समूह तथा व्यक्तिले कम्तीमा पनि दुई रोपनीदेखि पाँच रोपनीसम्म जग्गामा व्यावसायिक फूल खेती गर्नेछन् ।

बीउ राखेको ९० दिनमा उत्पादन लिन सकिने छ । गाउँपालिका तथा कृषक समूह, कृषकले विशेष गरी दसैँ तिहारलाई लक्षित गरेर फूल खेती सुरु गरेको उहाँले बताउनुभयो । गाउँपालिकाले यस वर्ष सयपत्री कर्मा ५५५ जातको बीउ लगाएको छ । एउटा बोटबाट ४०० सम्म फूल उत्पादन हुने र विभिन्न चरणमा आगामी चैतसम्म टिप्न सकिने उहाँको भनाइ छ ।

फूलको व्यावसायिक उत्पादन गर्न सकेको खण्डमा आर्थिक उपार्जन गर्न सकिने, खेर गइरहेको जमिनको सही सदुपयोग हुने, फूलको माध्यमबाट पालिकाको पहिचान स्थापित गर्न सकिनुका साथै यहाँको पर्यटन प्रवर्द्धनमा सहयोग पुग्ने देखिन्छ ।

कालीगण्डकी गाउँपालिका–४ को बिर्घा पुछारमा व्यावसायिक रुपमा ड्रागन खेती समेत परीक्षणका रुपमा गरिँदै आएको छ ।
रासस