२०७९ साल असार २० गते सोमबार

तपाईँ सुन्दै हुनुहुन्छः

अन्तर्राष्ट्रिय शान्ति सेना दिवस मनाइयो

रेडियो नेपाल २०७९ जेठ १३ गते १८:४६

काभ्रेपलान्चोक । नेपाली सेनाले विश्व शान्ति र्स्थापनामा खटिने शान्ति सैनिकले पुर्‍याएको योगदानको स्मरण गर्दै आज ‘अन्तर्राष्ट्रिय शान्ति सेना दिवस–२०२२’ विशेष कार्यक्रमका साथ मनाएको छ । काभ्रेपलाञ्चोकको पाँचखालस्थित वीरेन्द्र शान्तिकार्य तालिम केन्द्रमा आयोजित समारोहमा गृहमन्त्री बालकृष्ण खाँणले नेपाली सेना, नेपाल प्रहरी र सशस्त्र प्रहरी बल, नेपालले विश्व शान्ति स्थापना कार्यमा खटिएदेखि नै प्रदर्शन गरेको उच्च तहको पेशागत दक्षता एवं समर्पणको प्रशंसा गर्नुभयो । 

उहाँले तीन वटै सुरक्षा निकायका शान्ति सैनिकले शान्ति स्थापना कार्यमा पुर्‍याएको अतुलनीय योगदानका लागि विगत र हालका नेतृत्वसमेतलाई बधाई दिनुभयो । 

प्रधानसेनापति प्रभुराम शर्माले हालका दिनमा शान्ति मिसनमा बढ्दो सुरक्षा जटिलतालाई दृष्टिगत गरी शान्ति सैनिकको पेशागत क्षमता अभिवृद्धि गर्नु आवश्यकता रहेको बताउनुभयो । उहाँले संयुक्त राष्ट्र सङ्घको लैङ्गिक समानता रणनीतिप्रति नेपाली सेना प्रतिबद्ध रहेको र भविष्यमा शान्ति मिसनमा महिला सहभागितालाई वृद्धि गर्ने बताउनुभयो । 

समारोहमा गृहमन्त्री बालकृष्ण खाँणले विश्वशान्ति स्थापनाको सिलसिलामा वीरगति प्राप्त गरेका शान्ति सैनिकको सम्मानमा शान्ति स्मारकमा माल्यार्पण तथा पुष्पगुच्छा अर्पण गर्नु भएको थियो । उहाँले यस वर्ष शान्ति स्थापना कार्यमा निःस्वार्थ भावनाले बहादुरीपूर्वक कार्य गरी विशेष योगदान पुर्‍याउनु भएका दुई जनालाई प्रशंसापत्र तथा वीरगति प्राप्त पाँच जना नेपाली शान्ति सैनिकलाई मेडल (तक्मा) सहित सम्मानपत्र प्रदान गर्नु भएको थियो । समारोहमा प्रधानसेनापति प्रभुराम शर्माले संयुक्त राष्ट्रसङ्घको झण्डोत्तोलन गर्नु भएको थियो । 

बलाध्यक्ष रथी सरोजप्रताप राणाले विश्व शान्ति तथा सुरक्षा स्थापनाका लागि महत्त्वपूर्ण भूमिका निर्वाह गर्नुहुने सम्पूर्ण शान्ति सैनिकले पुर्‍याउनु भएको योगदानको प्रशंसा गर्नुभयो । रासस

सम्बन्धित