पहिरोले जयपृथ्वी राजमार्ग अवरुद्ध
![](https://onlineradionepal.gov.np/wp-content/uploads/2024/07/photo-3.jpg)
बझाङ । बझाङमा लगातारको वर्षापछि पहिरो खस्दा आज बिहानदेखि जयपृथ्वी राजमार्ग अवरुद्ध भएको छ ।
बझाङलाई अन्य जिल्लासँग जोड्ने एक मात्र राजमार्ग बन्द भएपछि जिल्लाभरिको आवागमन प्रभावित भएको छ ।
जयपृथ्वी राजमार्गको जालेबगर र तमैलमा पहिरोसँगै सडक माथिबाट ठूल्ठूला ढुङ्गा खसेपछि राजमार्ग अवरुद्ध भएको जिल्ला प्रहरी कार्यालय बझाङका डिएसपी भरत शाहले बताउनुभयो । जालेबगरको पहिरो स्काभेटर लगाएर पन्छाउने काम भइरहेको समेत डिएसपी शाहले बताउनुभयो ।
तमैलमा भने मेसिनले हटाउन नसक्ने ठूला ढुङ्गा खसेको कारण वैकल्पिक उपायको खोजी भइरहेको प्रमुख जिल्ला अधिकारी विश्वामित्र कुइँकेलले जानकारी दिनुभयो । “सडकमा ठुला ढुङ्गा खसेका कारण मेसिन प्रयोग गरेर हटाउन सकिएको छैन,” उहाँले भन्नुभयो, “ठूलो खालको मेसिन प्रयोग गरेर सकिन्छ भनेर कोसिस गरिरहेका छाँै ।”
![](https://onlineradionepal.gov.np/wp-content/uploads/2024/07/photo-1-1024x1024.jpg)
मनसुन सुरु भएयता जयपृथ्वी राजमार्ग पहिरोका कारण दिनहुँजसो अवरुद्ध हुन थालेको छ । आज दिउँसोबाट बझाङमा लगातार झरी परिरहेको छ । अविरल वर्षासँगै सेती नदीको सतह समेत बढ्न थालेकोले सर्तक रहन विपद् व्यवस्थापन समितिले सतर्कता सूचना जारी गरेको छ ।
नदीको सतह बढेसँगै बाढीको खतरा हुने भएकोले सेती नदी र यसका सहायक खोलाको आसपास बस्नेलाई सर्तक रहन जिल्ला प्रशासन कार्यालयले अनुरोध गरेको छ ।
जल तथा मौसम विज्ञान विभागको नदी सतह अनुगमन गर्ने वेबसाइटले दिउँसो १२ बजेर २० मिनेटमा सेती नदीमा पानीको सतह करिब तीन मिटरले बढेको जनाएको छ ।
वर्षासँगै आएको बाढीले बझाङ जिल्लाका अन्य शाखा सडकहरू पनि अवरुद्ध भएको जिल्ला प्रहरी कार्यालयले जनाएको छ ।
मष्टा, सुर्मा, खप्तडछान्ना, बुंगल, थलारालगायतका पालिकाका दर्जनौँ सडक अवरुद्ध भएपछि यातायात प्रभावित भएको छ ।
प्रतिक्रिया राख्नुहोस्