नेपाली काँग्रेस चितवनको जिल्ला सम्मेलन भोलिदेखि

चितवन । नेपाली काँग्रेस चितवनको जिल्ला सम्मेलन भोलिदेखि भरतपुरमा शुरुहुने भएको छ । भदौ २३ र २४ गते हुने उक्त सम्मेलनमा नेपाली काँग्रेसका वरिष्ठ नेता डाक्टर शेखर कोइराला, काँग्रेस महामन्त्री गगन थापा , विश्व प्रकाश लगायतका नेताहरूले सम्बोधन गर्ने कार्यक्रम रहेको छ । जिल्ला कार्यसमिति चितवनले आज भरतपुरमा पत्रकार सम्मेलन गरी यस बारे जानकारी दिएको हो । 

सो अवसरमा बोल्दै जिल्ला सभापति राजेश्वर खनालले सम्मेलनको लागि सम्पूर्ण तयारी पुरा भएको जानकारी दिनुभयो । सम्मेलनलाई उद्घाटन सत्र र बन्द सत्र गरी दुई चरणमा विभाजन गरिएको छ । जसअनुसार पहिलो दिन कार्यक्रमको उद्घाटन र दोस्रो दिन विपी शान्तिनगर वनमा विपी कोइरालाको प्रतिमा अनावरण गरिने कार्यक्रम रहेको खनालले बताउनु भयो  । 

सम्मेलनमा जिल्ला सभापति खनालले पार्टीको भावी नीति तथा कार्यक्रम सम्बन्धी प्रतिवेदन,सचिव ध्रुव पोख्रेलबाट साङ्गठनिक गतिविधि सम्बन्धी प्रतिवेदन र आर्थिक प्रतिवेदन कोषाध्यक्ष पवित्रा केसी बाट गरिने कार्यक्रम रहेको छ । सम्मेलनलाई सफल पार्न विभिन्न उप समिति समेत निर्माण गरिएको सभापति खनालले बताउनु भयो । 

नेपाली काँग्रेसलाई बदलिँदो परिवेशको थप चुनौती सामना गर्न सक्ने सक्षम र गतिशिल सङ्गठनको रुपमा विकास र विस्तार गर्नको लागि विभिन्न साङ्गठनिक , सामाजिक, राजनीतिक तथा रचनात्मक कार्यक्रमहरू प्रस्ताव गरिएको उहाँको भनाई छ । 

प्रविधिमैत्री साङ्गठनिक संरचना निर्माण गरी पार्टी नागरिकलाई एकैसाथ सूचना सञ्जालमा एकीकृत गर्ने, चितवन जिल्ला घर भई अन्यत्र बसोबास गर्ने पार्टी सदस्यहरूका लागि जिल्ला फर्क अभियान सञ्चालन गर्ने , वैदेशिक रोजगारीमा रहेका नागरिकहरूलाई वैदेशिक जनसम्पर्क समिति मार्फत एकीकृत गर्ने, पार्टीको केन्द्रीकृत गतिविधिलाई विकेन्द्रित गर्दै रचनात्मक कार्यसहित, हराभरा पालिका हाम्रो अभियान अन्तर्गत जिल्लाका सातवटै बाटिका, उद्यान पार्क र एक घर एक वृक्षारोपण, युवा तथा महिला जागरण अभियान लगायतका कार्यक्रमहरू प्रस्तुत गरिने सभापति खनालले जानकारी दिनुभयो ।

सम्मेलनमा पार्टी, समाजमा योगदान पुर्‍याएका विभिन्न विधाका ७० जना भन्दा बढीलाई सम्मान समेत गरिने नेपाली काँग्रेस चितवनले जानकारी दिएको छ ।