‘युवा वैज्ञानिक प्रोत्साहन कोषका लागि ऐन बनाउँछौँ’

मकवानपुर । बागमती प्रदेश सरकारले युवा वैज्ञानिक प्रोत्साहन कोष सञ्चालनका लागि ऐन बनाउने भएको छ । मुख्यमन्त्री शालिकराम जम्कट्टेलले कोष अहिले कार्यविधिमा रहेर सञ्चालन भइरहेको भन्दै अब ऐन निर्माण गरी सञ्चालन गरिने बताउनुभयो ।

कोषद्वारा सञ्चालित पाँच आयोजनाको उपलब्धि सार्वजनिक कार्यक्रममा उहाँले ऐन निर्माण गरी आगामी दिनमा पनि नयाँ प्रविधि प्रयोग गर्न युवा वैज्ञानिक कोषलाई अघि बढाइने बताउनुभयो । नयाँ प्रविधि, अनुसन्धानलाई प्रयोग गर्नेतर्फ सरकार तत्पर रहेको उल्लेख गर्दै मुख्यमन्त्री जमरकट्टेलले अनुसन्धानपश्चात् नवजीवनमा प्रयोग भएन भने अनुसन्धानको औचित्य नरहने बताउनुभयो ।

कोषमा रहेर पाँच आयोजना सञ्चालन गरिएको थियो । तीमध्ये दुई सम्पन्न भएको र तीन वटा सम्पन्नको तयारीमा छन् । सम्पन्न भएका आयोजनामा सफारी गाडीको विद्युतीय रूपान्तरण र डेन्टलप्लेटसम्बन्धी आयोजना रहेको कोषका अध्यक्ष एवं सामाजिक विकासमन्त्री कुमारी मोक्तानले जानकारी दिनुभयो ।

अन्य तीन वटा आयोजनामा च्याउ (खरानी/रातो) को विकास, फिस प्रोवायोटिक आयोजना र मेडिकल प्लान्टअन्तर्गत जडीबुटीबाट फाइटो केमिकलबारेको अनुसन्धान रहेका छन् ।

विद्युतीय गाडी निर्माण गर्ने आयोजना प्रमुख इन्जिनियर वसन्त आलेले अन्य गाडीको तुलनामा विद्युतीय गाडी १० गुणा राम्रो रहेको बताउँदै पुराना गाडीको सदुपयोग गर्न आवश्यक कानूनी व्यवधान खुला गर्न सरकारलाई आग्रह गर्नुभयो ।

कार्यक्रम डेन्टलप्लेट आयोजनाका प्रमुख डा प्रभाकर पराजुलीले प्राकृतिक दाँत जस्तै नक्कली दाँतका लागि काम गर्न सकिने बताउनुभयो । “हामीले गरेको अनुसन्धानमा राँगाको दाँतमा प्रयोग गराएका हौँ, सफल पनि भयौँ, अब हामीले सजिलै ३२ वटा देशमा यस प्रविधिको प्रयोग गर्न सक्छौँ”, डा पराजुलीले भन्नुभयो, “यस प्रविधिको नाम हामीले दन्त्यनिखन राखेका छौँ ।”