कावासोतीमा उपमेयर कप भलिबल प्रतियोगिता हुँदै

नवलपुर । नवलपरासी (बर्दघाट  सुस्तापूर्व ) नवलपुरको कावासोती नगरपालिकामा उपमेयर कप भलिबल प्रतियोगिता हुने भएको छ ।

वडा नं १२ स्थित डायमण्ड यूथ सोसाइटीको आयोजना तथा कावासोती नगरपालिकाको समन्वयमा भोलिबाट प्रतियोगिता सुरु  हुँदैछ ।  राज मन्दिर  खेल मैदानमा भोलि १० बजेदेखि प्रतियोगिताको उद्घाटन गरिने डायमण्ड यूथ सोसाइटीका सचिव नैनाराम थनेतले जानकारी दिनुभयो ।  

प्रतियोगितामा नगरको १७ वटा वडाबाट मात्रै सहभागिता  जनाउन पाइनेछ । वडा भित्रका  खेलाडीको टिमले वडाबाट  आधिकारिक पत्र सहित सहभागिता जनाउन पाइने सचिव थनेतले जानकारी दिनुभयो ।  प्रतियोगितामा प्रथम हुनेले ४० हजार नगद , शिल्ड मेडल र प्रमाणपत्र , द्वितीय हुनेले २५ हजार नगद शिल्ड, मेडल र प्रमाणपत्र प्राप्त गर्नेछ भने , तृतीय र सान्त्वना  हुनेले   सात हजार ५ सय नगद, शिल्ड, मेडल र प्रमाणपत्र  प्राप्त गर्ने  थनेतले बताउनुभयो । 

प्रतियोगिता पर्सि समापन हुनेछ । प्रतियोगिताको तयारी पुरा भएको छ ।

कावासोती नगरपालिकाको वार्षिक कार्यक्रम अन्तरगत  उपमेयर कप भलिबल प्रतियोगिता आयोजना गरिएको हो । खेलकुद क्षेत्रको विकास र दक्ष खेलाडी उत्पादन गर्ने उद्देश्यले नगरपालिकाले  खेलकुदका कार्यक्रमलाई निरन्तरता दिँदै आएको उप प्रमुख फुल  कुमारी  थनेतले  बताउनुभयो ।