बच्चा चोर्न आएको आरोपमा ३ भारतीय महिला पक्राउ

वीरगञ्ज । वीरगञ्ज महानगरपालिका १ छपकैयाबाट ३ भारतीय महिलालाई बच्चा चोर्न आएको आशङ्कामा स्थानीयले नियन्त्रणमा लिएर प्रहरीलाई बुझाएका छन् ।

वीरगन्ज महानगरपालिका १ बजार छपकैयाबाट स्थानीयले शङ्कास्पद अवस्थामा रहेका महिलालाई प्रहरीको जिम्मा लगाएका हुन ।

वडा प्रहरी कार्यालय बिर्ताका प्रहरी निरीक्षक विशाल मल्लले आज बिहान ९ बजे बजार छपकैया निवासी एक व्यक्तिको घरमा छिरेका ती महिलाहरूलाई बच्चा चोर्न आएको आशङ्कामा स्थानीयले नियन्त्रणमा लिएर प्रहरीको जिम्मा लगाएको बताउनुभयो ।

भारत बिहारको पश्चिमी चम्पारण जिल्लाको नरकटीयागन्जको पकडी ढाला घर भएका अन्दाजी ५०/५५ बर्षिया सयरी खातुन, मयरुन नेशा र छतौटी खातुनलाइ स्थानीयले नियन्त्रणमा लिएर प्रहरीमा बुझाएको प्रहरी निरीक्षक मल्लले जानकारी दिनुभयो ।

स्थानीयले बच्चा चोर्न आएको दाबी गरे पनि उनीहरू बच्चा चोर्न नभई औँठीमा जडान गरिने पत्थर, जन्तर र जडीबुटी बेच्न वीरगन्ज आएको प्रहरी समक्ष बयान दिएको मल्लले बताउनुभयो ।

छपकैयामा स्थानीयको घरमा शङ्कास्पद अवस्थामा पसेको हुँदा अभियुक्तहरू माथि थप अनुसन्धान भइरहेको मल्लले बताउनुभयो ।