कुल विद्युत् उत्पादन क्षमता २ हजार २ सय ६९ मेगावाट पुग्यो

काठमाडौँ । ऊर्जा, जलस्रोत तथा सिँचाइमन्त्री पम्फा भुसालले ऊर्जा क्षेत्रको विकासले मुलुकको आर्थिक विकासमा महत्त्वपूर्ण सहयोग पुग्ने बताउनुभएको छ । 

मन्त्रालय आज आफूले मन्त्रालय सम्हालेदेखि प्राप्त उपलब्धि सार्वजनिक गर्दै ऊर्जा, जलस्रोत तथा सिँचाइमन्त्री भुसालले आफू आएदेखि ऊर्जा क्षेत्रको विकास, उत्पादन, विस्तारमा ध्यान दिएको बताउनुभयो । 

उहाँले गरिबीमुक्त मुलुक बनाउँदै समाजवाद तर्फ लैजान ऊर्जा क्षेत्रको विकासले महत्त्वपूर्ण सहयोग पुर्‍याउने बताउनुभयो । 

मन्त्री भुसालले आफू आएपछि विद्युत् व्यापारको थालनी गरेको, बीस युनिटसम्मको विद्युत् महसुल निःशुल्क गरेको, विद्युत् महसुस घटाएको र वर्षा र हिउँदमा फरक फरक विद्युत् महसुल दर कायम गरेको जानकारी दिनुभयो । 

उहाँले लोड सेन्टरमा रहेको १२ सय मेगावाटको बुढीगण्डकी जलविद्युत आयोजना निर्माण यसै वर्षमा अघि बढाउने तयारी भइरहेको बताउनुभयो । 

मन्त्री भुसालले गत आर्थिक वर्षमा मन्त्रालयको वित्तीय ७६ दशमलव ६६ र भौतिक प्रगति ८० प्रतिशत हासिल गरेको बताउनुभयो । 

१७ बुँदे उपलब्धि सार्वजनिक गर्दै मन्त्री भुसालले गत आवमा विद्युत् उत्पादन क्षमता ७ सय ४१ मेगावाट थप भई कुल विद्युत् उत्पादन क्षमता २ हजार २ सय ६९ मेगावाट पुगेको बताउनुभयो । 

उहाँले महसुल पुनरावलोकन गरी सिँचाइमा प्रयोग हुने विद्युतमा ७५ प्रतिशतसम्म सहुलियत दिएर प्रति युनिट २ रुपैयाँसम्म महसुल कायम गरिएको जानकारी समेत दिनुभयो ।

देशको करिब ९५ प्रतिशत जनतामा विद्युत् पहुँच पुगेको बताउँदै मन्त्री भुसालले आगामी दुई वर्षमा देशलाई पूर्ण विद्युतीकरण गर्ने कार्ययोजना अघि बढाइएको बताउनुभयो ।