२०७९ साल असोज १९ गते बुधबार

तपाईँ सुन्दै हुनुहुन्छः

राष्ट्रपति भण्डारीद्वारा पाटन कृष्ण मन्दिरको दर्शन

रेडियो नेपाल २०७९ भदौ ३ गते १९:३६

ललितपुर । राष्ट्रपति विद्यादेवी भण्डारीले पाटन कृष्ण मन्दिरको दर्शन गर्नुभएको छ । आज भाद्र कृष्ण अष्टमी अर्थात् ‘श्रीकृष्ण जन्माष्टमी’ पर्वका अवसरमा उहाँले पाटनको कृष्ण मन्दिर आएर जल तथा प्रसाद ग्रहण गर्नुभयो ।

मन्दिरका मूल पुजारी रुपन शर्मा राजोपाध्यायले भण्डारीलाई मन्दिरको जलले अभिषेक गरी प्रसाद प्रदान गर्नुभएको थियो । साथै पुजारी टोलीले उहाँलाई अन्य बाँकी प्रसाद समेत प्रदान गरेको थियो ।

राष्ट्रपति भण्डारीले कृष्णको दर्शन र आराधनासँगै पाटनमा रहेको मङ्गहिटी समेतको बारेमा जानकारी लिनुभएको थियो ।

सोही क्रममा राष्ट्रपति भण्डारीलाई ललितपुर महानगरपालिकाका प्रमुख चिरीबाबु महर्जनले आफूहरूले नेपाल सरकारसँग एक रुपैयाँ नलिई कृष्ण मन्दिर नजिकै रहेको व्यापारीको आराध्य देव भीमसेन मन्दिर पुनर्निर्माण गरेको जानकारी गराउनुभयो ।

सो कुरा सुनेसँगै राष्ट्रपति भण्डारीले आफू छिट्टै पाटन दरबार आएर भीमसेन मन्दिरको अवलोकन गर्ने वचनबद्धता व्यक्त गर्नुभएको महानगरपालिकाका प्रमुख महर्जनले बताउनुभयो ।

सो अवसरमा ललितपुर क्षेत्र नं १ प्रतिनिधि सभाका सांसद नवराज सिलवाल, ललितपुरका प्रमुख जिल्ला अधिकारी घनश्याम उपाध्याय, महानगरपालिकाका उपप्रमुख मञ्जली शाक्य बज्राचार्य, महानगरपालिकाका वडाध्यक्षहरू, मङ्गल टोल सुधार सङ्घका अध्यक्ष किरणमान प्रधान, ललितपुर उद्योग वाणिज्य सङ्घका अध्यक्ष मनोजबहादुर न्याछ्यों लगायतले राष्ट्रपति भण्डारीको स्वागत गर्नुभएको थियो ।
रासस

सम्बन्धित