वित्तीय संस्थामा कार्यरत सुरक्षा गार्डहरूलाई सुरक्षासम्बन्धी अभिमुखीकरण सम्पन्न

बारा । बाराको जीतपुरसिमरा उपमहानगरपालिका क्षेत्रमा अवस्थित बैङ्क तथा वित्तीय संस्थामा कार्यरत सुरक्षा गार्डहरूलाई एक दिने सुरक्षासम्बन्धी अभिमुखीकरण कार्यक्रम सम्पन्न भएको छ ।

अभिमुखीकरणमा बैङ्क तथा वित्तीय संस्थामा आउन सक्ने सुरक्षासम्बन्धी जोखिमलाई न्यूनीकरण गर्न सक्ने विषयमा सुरक्षा गार्डहरूलाई प्रशिक्षण दिइएको जितपुरसिमरा बैंकर्स क्लबका संयोजक कृष्ण गौतमले जानकारी दिनुभयो ।

ईलाका प्रहरी कार्यालय सिमराका प्रहरी निरीक्षक राजकिशोर साहले सुरक्षाको सवालमा देखापर्ने विभिन्न समस्याको विषयमा अवगत गराउँदै अपनाउनुपर्ने सुरक्षाको प्रक्रियाको विषयमा जानकारी गराउनुभएको थियो ।

अभिमुखीकरण कार्यक्रममा जीतपुरसिमरा उपमहानगरपालिका क्षेत्रको बैङ्क तथा वित्तीय संस्थामा कार्यरत २३ जना सुरक्षा गार्डहरूको सहभागिता थियो ।