राष्ट्रिय खुल्ला दोहोरी गीत प्रतियोगिताको उपाधि नगरकोटलाई
पोखरा । पोखरामा आयोजित राष्ट्रिय खुल्ला दोहोरी गीत प्रतियोगिताको उपाधि नगरकोट दोहोरी साँझ काठमाडौँले जितेको छ । फाइनल प्रतिस्पर्धामा दरबार दोहोरी साँझ काठमाडौँलाई पराजित गर्दै नगरकोटले उपाधि चुमेको हो । प्रतियोगिताको तेस्रो स्थानको उपाधि जुनकिरी दोहोरी क्लब र नेम्बो रोधीघर अस्ट्रेलियाले प्राप्त गरेका छन् ।
कल्याण शेरचन स्मृति प्रतिष्ठानद्वारा आयोजना गरिएको राष्ट्रिय खुल्ला दोहोरी गीत प्रतियोगितामा सहभागिता जनाउन देशभरबाट कुल ४८ टिमले नाम दर्ता गराएका थिए भने ती मध्ये ४५ टिमले प्रतियोगितामा भाग लिएका थिए ।
प्रतियोगितामा उत्कृष्ट गायकको उपाधि दोहोरी गीत प्रतिष्ठान गण्डकीका सुमन खड्का र उत्कृष्ट गायिकाको उपाधि प्रतिष्ठान गण्डकीकी सीता परियार घोषित हुनुभयो । यसैगरी अनुशासित टिम धौलागिरि दोहोरो साँझ ओसाका जापान बन्न सफल भयो भने नव प्रतिभा प्रोत्साहन पुरस्कार जुनेली दोहोरी साँझकी शान्ति कार्कीले प्राप्त गर्नु भयो ।
प्रतियोगिताको विजेता समूहले ६ लाख रुपैयाँ नगद पुरस्कार हात पारेको छ । यसैगरी उपविजेतासमूहले ४ लाख, तृतीय हुन सफल दुई समूहले डेढ–डेढ लाख नगद पुरस्कार हात पारेको प्रतियोगिता संयोजक जीवन दाहालले जानकारी दिनु भयो ।
उत्कृष्ट गायक, उत्कृष्ट गायिका र अनुशासित टिमलाई ५० हजार रुपैयाँ नगद पुरस्कार प्रदान गरिएको थियो । नव प्रतिभा प्रोत्साहन पुरस्कार जित्ने प्रतिभालाई १० हजार रूपैँया प्रदान गरियो । यो सँगै गत साउन १२ गतेबाट पोखरा सभागृह हलमा सुरु भएको प्रतियोगिता पाँचौँ दिनमा सम्पन्न भएको छ । प्रतियोगिता अपेक्षा गरेभन्दा भव्य रुपमा कार्यक्रम सम्पन्न भएको आयोजकको ठहर रहेको छ । यो प्रतियोगितामा निर्णायक संयोजकको जिम्मेवारी राष्ट्रिय लोक तथा दोहोरी गीत प्रतिष्ठान नेपालका अध्यक्ष रमेश विजयीलाई थियो।
लोक गायक, स्रष्टा, शिल्पी कल्याण शेरचनको ७६ औँ जन्मजयन्तीका अवसर पारेर प्रतियोगिता आयोजना गरिएको हो ।
प्रतिक्रिया राख्नुहोस्