२०७९ साल असार १८ गते शनिबार

तपाईँ सुन्दै हुनुहुन्छः

गौतम बुद्ध विमानस्थलको शुभारम्भले मुलुकको पर्यटन र दिगो आर्थिक विकासको आधार तयार भयो : प्रधानमन्त्री देउवा

रेडियो नेपाल २०७९ जेठ २ गते १३:३०

रुपन्देही । प्रधानमन्त्री शेरबहादुर देउवाले गौतम बुद्ध अन्तर्राष्ट्रिय विमानस्थलको आज औपचारिक उद्घाटन गर्नुभएको छ । 

विमानस्थलको आज भैरहवामा उद्घाटन गर्दै उहाँले मुलुकको पर्यटन र दिगो आर्थिक विकासको आधार तयार भएको बताउनुभयो । 

उहाँले विमानस्थल सञ्चालनमा आएसँगै पर्यटकको आवागमन बढ्ने विश्वास पनि व्यक्त गर्नुभयो ।  प्रधानमन्त्री देउवाले नेपाल पर्यटनका अधिक सम्भावना रहेको देश भएकाले यहाँका सम्भावना र गौतमबुद्धको जन्मस्थल लुम्बिनी बारेको सन्देश संसारमा पुर्‍याउन यो विमानस्थल सहयोगी सिद्ध हुने पनि बताउनुभयो ।  

गृहमन्त्री बालकृष्ण खाणले गौतम बुद्ध विमानस्थलले पर्यटन प्रवद्र्धनमा ठूलो टेवा पुग्ने बताउनुभयो । उहाँले कोभिड महामारीका कारण विमानस्थल निर्माणमा केही ढिलाइ भए पनि सबैको प्रयत्नले सफलतापूर्वक सम्पन्न भएको बताउनुभयो । 

उहाँले विमानस्थल निर्माणमा भूमिका निर्वाह गर्ने पूर्व प्रधानमन्त्री तथा पूर्व पर्यटन मन्त्रीलाई धन्यवाद दिनुभयो । उहाँले सबैको साथ र सहयोगका कारण विमानस्थल निर्माणको काम सम्पन्न भएको बताउनुभयो ।

पर्यटन तथा नागरिक उड्डयन मन्त्री प्रेमबहादुर आलेले बुद्ध भूमिबाट  नेपालको शान्ति र समृद्धिको सन्देश विश्वभर प्रवाह हुने बताउनुभयो । उहाँले शान्तिको सन्देश लिएर नेपाली र अन्तर्राष्ट्रिय विमानस्थल गौतम बुद्ध विमानस्थलबाट संसारभर पुग्ने विश्वास व्यक्त गर्नुभयो । 

उहाँले  पर्यटन मन्त्रालयमार्फत सञ्चालनमा रहेका पाँच वटा राष्ट्रिय गौरवका आयोजनामध्ये सम्पन्न हुने आयोजनाका रुपमा गौतम बुद्ध विमानस्थल रहेको बताउनुभयो ।  यी पाँच वटै आयोजना सम्पन्न भएपछि मुलुकको पर्यटन र आर्थिक विकासले फड्को मार्ने बताउनुभयो । 

उहाँले आजैदेखि त्रिभुवन विमानस्थल र गौतम बुद्ध विमानस्थल २४ सै घण्टा सञ्चालन हुने घोषणा गर्नुभयो । नेपाल नागरिक उड्डयन प्राधिकरणका महानिर्देशक प्रदीप अधिकारीले राष्ट्रिय गौरवका आयोजना अन्तर्गत निर्मित यो विमानस्थल अन्तर्राष्ट्रिय उडान सञ्चालनमा आएपश्चात् त्रिभुवन अन्तर्राष्ट्रिय विमानस्थलको विकल्प बन्नुका साथै त्रिभुवन अन्तर्राष्ट्रिय विमानस्थलमा प्राविधिक समस्या भई वायुयान उडान अवतरण हुन नसक्ने अवस्थामा छिमेकी मुलुकमा पुर्‍याएर अवतरण गराउनुपर्ने बाध्यता अन्त्य भएको बताउनुभयो ।

सिद्धार्थनगर नगरपालिकामा अवस्थित यस विमानस्थललाई नेपालको एक बहुआयामिक आयोजनाको रुपमा लिइएको जनाउँदै उहाँले यो गौतमबद्धको जन्मस्थल लुम्बिनीको प्रवेशद्वार हुनुका साथै विश्वलाई यस क्षेत्रसँग जोड्ने सम्पर्क माध्यम भएको जनाउनुभयो ।

सन् २०१७ डिसेम्बरभित्र निर्माण सक्ने गरी सन् २०१५ को सुरुमा थालनी भएको विमानस्थलको काम बीचमा ठेकेदार कम्पनीको लापरबाहीले रोकिएको थियो । पछिल्लो पटक सन् २०२० को मार्चसम्म निर्माण सक्ने योजना रहे पनि कोभिड–१९ महामारीका कारण करिब पाँच वर्षपछि विमानस्थल व्यावसायिक रुपमा सञ्चालनमा आएको हो ।

एसियाली विकास बैङ्कको सहुलियतपूर्ण ऋणमा निर्माण भएको यो आयोजनाको पहिलो चरणमा करिब रु ११ अर्ब खर्च भएको प्राधिकरणले जनाएको छ ।

अब दोस्रो चरणको टर्मिनल भवन पनि छिट्टै निर्माण प्रक्रिया अघि बढाइने छ । चिनियाँ निर्माण कम्पनीद्वारा निर्मित यो विमानस्थलमा यान्त्रिक परीक्षण उडान क्यालिब्रेसन फ्लाइट) सम्पन्न भए लगत्तै आन्तरिक एयरलाइन्सले उडान गरिरहेका छन् । यहाँबाट निजी क्षेत्रको बुद्ध एयर, यती एयरलाइन्स, श्री एयरलाइन्स, सौर्य एयरलाइन्सलगायत कम्पनीले उडान भर्दै आएका छन् । रासस

सम्बन्धित