२०७९ साल जेठ ५ गते बिहीबार

तपाईँ सुन्दै हुनुहुन्छः

रिसाललाई नइ कीर्तिनिधि र प्रा.डा.भट्टराईलाई नइ चन्द्रधन पुरस्कार दिइने

रेडियो नेपाल २०७९ वैशाख २९ गते १६:२५

काठमाडौँ । नइ प्रकाशनले नेपालमा स्तरीय शिक्षा प्रणालीका लागि गुरुत्तर भूमिका निर्वाह गरी शिक्षा सेवामा समर्पित शिक्षाविद् डा सुरेशराज शर्मालाई २०७८ सालको ‘नइ देरुनीख सुकीर्ति पुरस्कार’ समर्पण गर्ने निर्णय गरेको छ । 

प्रकाशनका अध्यक्ष इन्दिरा प्रसाईँका अध्यक्षतामा बसेको प्रकाशनको बैठकले सनातन हिन्दूधर्म, संस्कृतिको सम्वद्र्धन, संरक्षण तथा जागरणका लागि क्रियाशील प्रा.डा. माधव भट्टराईलाई ‘नइ चन्द्रधन पुरस्कार’ समर्पण गर्ने निर्णय पनि गरेको छ । 

नेपालको स्वाभिमान, राष्ट्रिय अखण्डता र स्वतन्त्रता विषयक चिन्तन र प्रचारमा सदैव समर्पित भई मातृभूमिप्रति गरेको विशिष्ट योगदानका निम्ति वरिष्ठ पत्रकार भैरव रिसाललाई ‘नइ कीर्तिनिधि पुरस्कार’ समर्पण गरिने भएको प्रकाशनका सदस्यसचिव नरेन्द्रराज प्रसाईँले विज्ञप्ति जारी गरी जानकारी दिनुभयो । 

यस्तै सामाजिक जागरण र जनचेतनाका लागि हास्य व्यङ्गमार्फत देश देशान्तरमा नेपाली भाषालाई जनप्रिय बनाउन उद्यत कलाकार सन्तोष पन्तलाई ‘नइ भूपालदुर्गा पुरस्कार’, नेपाली समालोचनाको परम्परालाई गतिशील, समृद्ध र उन्नत तुल्याउन योगदान गरेबापत प्रा डा दयाराम श्रेष्ठलाई ‘नइ ईश्वर बराल पुरस्कार’, स्वास्थ्य विज्ञानमा समर्पित रहँदै नेपालमा टेष्टट्युब चिकित्साको गुरुत्तर भूमिका, सफल प्रयोग र योगदानका लागि डा भोला रिजाललाई ‘नइ भावी पुरस्कार’ र गीतिकविता लेखनका माध्यमबाट नेपाली भाषालाई जनप्रिय बनाई जनमन छुन सफल प्रेमविनोद नन्दनलाई ‘नइ कोइलीदेवी पुरस्कार’ समर्पण गरिने भएको छ ।

मैथिली तथा नेपाली भाषा साहित्यको श्रीवृद्धिमा योगदान पुर्‍याई नेपाली राष्ट्रिय एकताको सुदृढीकरणका निम्ति उल्लेखनीय भूमिका खेलेबापत डा रामदयाल राकेशलाई भने ‘नइ भाजप पुरस्कार’ दिइने छ । आठै पुरस्कार ताम्र पत्रसहित जनही रु एक लाख राशिको हुने जनाइएको छ । 

सम्बन्धित